Sipas një raporti të fundit të publikuar nga “Florida Department of Health”, në 28 nga 46 produkte të njohura ëmbëlsirash u zbuluan nivele arseniku që u konsideruan toksike nga autoritetet. Lajmi u raportua edhe nga faqja amerikane e ushqimit EatingWell.
Testimet përfshinë një gamë të gjerë produktesh, që nga çokollatat deri te karamelet dhe çamçakëzat, përfshirë marka të njohura si KitKat, Snickers, Twix, Hershey’s, Mars dhe Tootsie Roll Industries, ndër të tjera.
Arseniku është një element që mund të gjendet natyrshëm në ushqime, por kur paraqitet në nivele të larta, ai mund të përbëjë rrezik serioz për shëndetin. Ekspozimi i zgjatur lidhet me rritjen e rrezikut për disa lloje kanceri, përfshirë atë të mushkërive, lëkurës, veshkave dhe fshikëzës së urinës, si edhe me dëmtime të sistemit nervor dhe organeve të brendshme.
Raporti përmend gjithashtu produkte të tjera që rezultuan me nivele të larta arseniku, si Black Forest Gummy Bears, Laffy Taffy, Nerds, Twizzlers dhe Skittles. Lista është e gjatë dhe përfshin produkte që konsumohen shpesh nga fëmijët dhe adoleshentët.
Ekspertët e shëndetit theksojnë rëndësinë e konsumit të moderuar, jo vetëm për shkak të pranisë së mundshme të arsenikut, por edhe për përmbajtjen e lartë të sheqerit në këto produkte. Autoritetet kanë publikuar udhëzime për sasinë e sigurt të konsumit për secilin produkt, duke synuar rritjen e ndërgjegjësimit të konsumatorëve për çështjet e sigurisë ushqimore. /skyweb.al
