Autoritetet amerikane të aviacionit kanë ngritur alarmin pas dy incidenteve serioze që përfshijnë avionë të prodhuar nga Boeing, ku temperatura në kabinën e pilotëve u rrit mbi kufijtë e sigurisë, duke krijuar një situatë të rrezikshme të përshkruar si “efekt saune”. Sipas raportimeve, pilotët nuk arritën ta ulnin temperaturën përmes procedurave standarde, duke u përballur me rreziqe reale për shëndetin, pasi nxehtësia ekstreme mund të shkaktojë marramendje, lodhje të theksuar apo edhe humbje ndjenjash.
Pas këtyre ngjarjeve,Administrata Federale e Aviacionit në SHBA ka nisur hetime dhe ka vendosur masa për 771 avionë që operojnë në Shtetet e Bashkuara. Bëhet fjalë për modelet 737-8, 737-9 dhe 737-8200, pjesë e familjes 737 MAX. Sipas autoriteteve, këta avionë mund të kenë të njëjtin problem elektrik që ndikon në funksionimin e sistemit të kondicionimit të ajrit, duke krijuar rrezik si për ekuipazhin, ashtu edhe potencialisht për pasagjerët.
FAA ka urdhëruar që linjat ajrore të zbatojnë menjëherë masa të përkohshme sigurie dhe brenda 30 ditëve të përditësojnë Manualin e Fluturimit të Avionit (AFM). Kostoja e përditësimit vlerësohet rreth 85 dollarë për avion, por autoritetet theksojnë se masa është thelbësore për garantimin e sigurisë.
Sipas udhëzimeve të reja, në rast se problemi shfaqet gjatë fluturimit, piloti duhet të planifikojë ulje të menjëhershme në aeroportin më të afërt. Pas marrjes së lejes për ulje, avioni duhet të zbresë në një lartësi maksimale prej 10 mijë këmbësh dhe lejohet vetëm një përpjekje për rindezjen e sistemit elektrik. Nëse defekti vazhdon, ekuipazhi duhet të presë jo më shumë se dy minuta përpara se të nisë procedurat për ulje emergjente.
Në situata alarmi, mund të ndërpriten shërbime jo thelbësore në bord, si sistemet e argëtimit, dhe të reduktohet ndriçimi për të ulur ngarkesën elektrike. Një nga masat më të ndjeshme është hapja e derës së blinduar që ndan kabinën e pilotëve nga pasagjerët, për të lejuar qarkullimin e ajrit më të freskët. Kjo derë zakonisht qëndron e mbyllur për arsye sigurie, ndaj hapja e saj konsiderohet veprim i jashtëzakonshëm dhe përdoret vetëm në emergjenca.
Nga ana tjetër, Boeing ka premtuar ndërhyrje strukturore në qarqet elektrike të avionëve të prekur, me synimin për të parandaluar përsëritjen e incidenteve dhe për të garantuar standarde më të larta sigurie në të ardhmen. /skyweb.al
