Administrata Doganore ka përcaktuar nivelet e gjobave për rastet e mosdeklarimit ose deklarimit të rremë të shumave monetare në pikat e kalimit kufitar, të cilat ndryshojnë në varësi të vlerës së padeklaruar.
Për shumat nga 10.000 deri në 19.999 euro ose kundërvlerën e tyre në valuta të tjera, gjoba është 20.000 lekë në rastin e parë. Në rast përsëritjeje aplikohet gjobë në masën 10% të vlerës së padeklaruar, ndërsa për rastet e tjera masa arrin në 30%.
Për shumat nga 20.000 deri në 49.999 euro, gjoba për shkeljen e parë është 40.000 lekë. Në shkeljen e dytë aplikohet 20% e vlerës së padeklaruar dhe për rastet pasuese 40%.
Ndërsa për shumat mbi 50.000 euro, gjoba në shkeljen e parë është 60.000 lekë. Në rast përsëritjeje ajo arrin në 30% të vlerës së padeklaruar dhe për rastet e tjera në 50%.
Autoritetet theksojnë se në rast mosdeklarimi ose deklarimi të rremë, përveç gjobës administrative, rasti mund të trajtohet edhe sipas dispozitave të Kodit Penal dhe Kodit të Procedurës Penale.
