Një demonstrim i parë i taksive ajrore elektrike është zhvilluar në San Francisco, duke ofruar një pamje të transportit urban të së ardhmes. Kompania Joby Aviation realizoi një fluturim testues mbi zonën e Gjirit, duke treguar aftësitë e avionëve të vegjël elektrikë për transport të shpejtë të pasagjerëve, shkruan Associated Press.
Avioni fluturoi pranë pikave ikonike si Golden Gate Bridge, në një itinerar që nisi nga Oakland International Airport. Ky demonstrim është pjesë e një turneu prezantues në SHBA për promovimin e teknologjisë së re të transportit ajror urban.
Sipas kompanisë, këto mjete janë të projektuara për të ofruar udhëtime të shpejta dhe relativisht të qeta, duke reduktuar ndjeshëm kohën e lëvizjes në qytetet e mëdha. Drejtuesi i saj, JoeBen Bevirt, e cilësoi këtë si një hap të rëndësishëm drejt realizimit të projektit.
Federal Aviation Administration (FAA) e ka përfshirë kompaninë në një program pilot për integrimin e avionëve elektrikë me ngritje dhe ulje vertikale (eVTOL), i cili do të testojë përdorime të ndryshme, përfshirë transportin e mallrave dhe misionet mjekësore.
Sipas planit, operacionet e para mund të nisin brenda disa muajsh në disa shtete amerikane, megjithëse ende nuk ka një afat për shërbimin në San Francisko. Kompania synon që çmimet të jenë të ngjashme me shërbime premium si Uber Black, ndërsa në të ardhmen po shqyrtohen edhe fluturimet autonome pa pilot./skyweb.al
