Një operacion i gjerë kundër call center-ave mbrëmë në Tiranë ka çuar në arrestime dhe sekuestrime të konsiderueshme, megjithëse dyshohet se drejtuesit kryesorë të skemës janë njoftuar paraprakisht dhe kanë mundur t’i shpëtojnë prangave.
Aksioni është zhvilluar nga Drejtoria për Hetimin e Krimit Kibernetik dhe po udhëhiqet nga prokurorja Rovena Bozo, në bashkëpunim me strukturat përkatëse hetimore.
Sipas të dhënave, janë vendosur 9 masa sigurie, ku për 7 persona është firmosur “arrest në burg”, ndërsa dy të tjerë janë lënë në “detyrim paraqitje” dhe “ndalim daljeje jashtë vendit”. Mes të arrestuarve janë Eduart Dalla, Tedi Agastra, Mateo Hoxha, Ledio Toçi, Xhoel Mekolli, Marsel Lami, Xhoji Hitaj.
Operacioni është shtrirë në tre call center të shpërndarë në katër ambiente pune, me rreth 300 poste pune në total.
Dy prej tyre ndodheshin në “Millennium Business Center”, në Rrugën e Kavajës, ndërsa një tjetër në afërsi të Kopshtit Zoologjik të Tiranës.
Gjatë kontrolleve janë sekuestruar rreth 1 milion euro cash, të cilat dyshohet se janë përfituar nga aktiviteti i paligjshëm i mashtrimit përmes telefonit.
Hetimet paraprake tregojnë se skema kishte në shënjestër shtetas të huaj nga Austria, Italia, Spanja, Greqia, Kanadaja dhe Shtetet e Bashkuara të Amerikës, të cilët dyshohet se janë mashtruar përmes metodave të sofistikuara telefonike.
Burime pranë hetimit bëjnë me dije se operacioni është zhvilluar edhe nën bashkëpunimin dhe presionin e autoriteteve të huaja, veçanërisht atyre gjermane dhe austriake. Megjithatë, mungesa e arrestimeve në nivelet drejtuese ka ngritur dyshime për rrjedhje informacioni dhe përfshirje të elementëve të korruptuar që mund të kenë paralajmëruar krerët e këtyre rrjeteve.
Hetimet vijojnë për të zbardhur plotësisht strukturën e këtij aktiviteti dhe për të identifikuar organizatorët kryesorë, të cilët edhe këtë herë duket se i kanë shpëtuar goditjes direkte.
Arrest me burg
Eduart Dalla
Mateo Hoxha
Tedi Agastra
Ledio Toçi
Xhoel Mekolli
Marsel Lami
Xhoji Hitaj
Ndalim dalje jashtë vendi
Aida Vokli
Ledjon Cenaj
/skyweb.al
