Zbatimi i kalendarit kombëtar të vaksinimit mundëson parandalimin e 13 sëmundjeve infektive, ndërsa vaksina kundër Hepatiti B mbetet një ndër më të rëndësishmet, pasi mbron jo vetëm nga infeksioni, por edhe nga Kanceri i mëlçisë.
Sipas koordinatores së Programit Kombëtar të Vaksinimit në Institutin e Shëndetit Publik, Rovena Daja, mbulimi me këtë vaksinë në vend është shumë i lartë, duke arritur në 98%. Ajo thekson se fëmijët e vaksinuar që në lindje rezultojnë negativë ndaj hepatitit B dhe, në të ardhmen, kanë mbrojtje të konsiderueshme edhe ndaj kancerit të mëlçisë.
Një tjetër vaksinë me rëndësi në parandalimin e sëmundjeve tumorale është ajo kundër Human Papilloma Virus (HPV). Kjo vaksinë aplikohet në Shqipëri që prej vitit 2022 për vajzat 13-vjeçare, ndërsa nga janari 2026 ka nisur edhe vaksinimi i djemve. Deri më tani, mbi 50 mijë fëmijë e adoleshentë e kanë marrë këtë vaksinë.
Megjithatë, ekspertët shprehen të shqetësuar për nivelin e ulët të vaksinimit kundër Fruthi, duke paralajmëruar se kjo situatë rrit rrezikun për përhapjen e sëmundjes tek fëmijët.
Në kuadër të Javës së Imunizimit, specialistët e shëndetit publik bëjnë apel për respektimin e kalendarit të vaksinimit, duke e konsideruar atë si mënyrën më efektive për mbrojtjen nga sëmundjet infektive. Sipas tyre, vaksinat përbëjnë një nga arritjet më të mëdha të mjekësisë, pasi vetëm në 50 vitet e fundit kanë shpëtuar rreth 150 milionë jetë njerëzish.
