Kreu i Partisë së Lirisë u paraqit në sallën e gjyqit në kafazin e xhamit, duke tërhequr vëmendjen jo vetëm për praninë e tij, por edhe për mënyrën si u shfaq para publikut. Meta përshëndeti të pranishmit me dy gishtat lart dhe më pas bëri simbolin e shqiponjës me duar, duke thënë “Shqipëria e shqiptarëve”.
Gjatë fjalës së tij, ai hodhi akuza të drejtpërdrejta ndaj procesit gjyqësor, duke e cilësuar atë të padrejtë. “Nuk jam unë në pozita të pabarabarta, por ata. Me shpifje dhe gënjeshtra, një proces i turpshëm kundër shtetit shqiptar. Nga sot deri në momentin e fundit, ju ftoj të ndiqni dhe transmetoni seancën”, u shpreh Meta nga kafazi i xhamit.
Seanca e parë e gjyqit u ndoq edhe nga përfaqësues politikë, ku deputetë të Partisë Demokratike dhe të Partisë së Lirisë mbërritën në ambientet e GJKKO-së për të qenë të pranishëm.
Para nisjes së seancës, avokati mbrojtës i Metës dha një deklaratë të shkurtër për mediat, duke theksuar rëndësinë e këtij momenti për procesin. “Seanca e parë është si dashuria e parë, nuk harrohet. Tani fillon beteja!”, u shpreh ai. /skyweb.al
