Linja ajrore gjermane Lufthansa ka bërë të ditur se po kërkon një statujë të humbur Oscar-i, që i përkiste regjisorit rus Pavel Talankin, pasi raportimet tregojnë se autoritetet amerikane të sigurisë nuk e lejuan atë ta merrte me vete në kabinën e avionit nga Nju Jorku.
Sipas faqes së specializuar për industrinë e filmit ”Deadline”, Talankin, fitues i çmimit Oscar për dokumentarin “Mr Nobody against Putin”, u ndalua të mbante statujën me vete në një fluturim nga aeroporti JFK të mërkurën.
Zyrtarët e Administratës së Sigurisë së Transportit të SHBA-së (TSA) argumentuan se statuja mund të konsiderohej si objekt i rrezikshëm dhe potencialisht si armë, duke e detyruar regjisorin ta dorëzonte në bagazhin e kontrolluar, të paketuar në një kuti kartoni.
Megjithatë, kur Talankin mbërriti në Gjermani, statuja nuk u gjet mes bagazheve të tij.
“Na vjen shumë keq për këtë situatë”, deklaroi Lufthansa, duke shtuar se po e trajton rastin me prioritet maksimal dhe po zhvillon kërkime intensive për të gjetur dhe kthyer Oscar-in sa më shpejt.
Talankin, 35 vjeç, i cili punon si videograf në një shkollë provinciale në Rusi, tërhoqi vëmendje ndërkombëtare pasi fitoi Oscar-in për Dokumentarin më të Mirë në mars, së bashku me regjisorin amerikan David Borenstein.
Filmi i tyre përmban pamje të filmuara fshehurazi nga Talankin në Rusi dhe dokumenton futjen e programeve patriotike pro-luftës në shkollat ruse gjatë presidencës së Vladimir Putin, në sfondin e luftës në Ukrainë.
Regjisori u shpreh për ”Deadline” se kishte udhëtuar shumë herë me statujën pa asnjë problem. “Është e pakuptueshme që një Oscar të konsiderohet armë”, tha ai, duke shtuar se më parë e kishte marrë gjithmonë në kabinë pa asnjë pengesë.
Sipas raportimeve, një punonjës i Lufthansa-s kishte ofruar ta ndihmonte duke e transportuar statujën në mënyrë të sigurt deri në avion, por kjo zgjidhje u refuzua nga një zyrtar i TSA-së.
