Nëse ke ende një kredi për të shlyer dhe të ndodh diçka e papritur me jetën, shëndetin apo vendin tënd të punës, me të ardhurat e tua apo me fuqinë tënde paguese për shlyerjen e një kredie, a do të doje që barra e rëndë e borxhit të pashlyer të mbetej mbi supet e njerëzve të cilët ti do më shumë?
A do të pëlqente t’i vishje ata me peshat e rënda të një borxhi?!
T’ua rrezikoje stabilitetin financiar? Shtëpinë? Pronën?
Nëse përgjigjja që të vjen më natyrshëm është “Jo”, të lutem lexoje deri në fund këtë artikull ndërgjegjësues në kuadër të edukimit financiar.
Përmes këtyre radhëve synojmë të shpjegojmë se pse PPI (Payment Protection Insurance), i njohur në shqip si sigurimi i jetës së debitorit, është një produkt sigurimi i shkëlqyer me vlera të trefishta: në familje, në shoqëri dhe në ekonomi.
Kujdes për familjen
PPI-ja, ose sigurimi i jetës së kredimarrësit, është sigurimi, që i mbron bankës shumën e mbetur pa shlyer të kredimarrësit në rast vdekjeje.
Bankat, për të mbrojtur investimet e tyre, ua kushtëzojnë kredimarrësve me detyrim pasjen e këtij lloj sigurimi.
Çdo vit kredimarrësi siguron pjesën e mbetur pa shlyer të kredisë. Kjo, në varësi të risqeve.
Detyrimisht klienti orientohet të zgjedhë rrezikun e rastit të vdekjes, ose thënë ndryshe: të sigurojë jetën.
Në rast se kredimarrësi vdes, prona e blerë me kredi i mbetet trashëgimtarëve ligjorë.
Familja e ruan pronën e blerë nga kredia. Ajo nuk do të preket.
Pjesa e mbetur pa paguar nga kredimarrësi do të paguhet nga siguruesi.
Trashëgimtarët ligjorë të kredimarrësit gëzojnë pronën dhe nuk u mbetet pas asnjë barrë financiare për shlyerjen e borxhit, sepse për të përgjigjet siguruesi.
Kjo është vlera e këtij sigurimi nga perspektiva e përfitimeve të familjes: humbja e njeriut të dashur nuk shoqërohet me kolapsin apo stresin financiar të shlyerjes së detyrimeve ndaj bankës.
Ky nuk është risku i vetëm që mund të sigurohet me PPI: me kërkesë të kredimarrësit mund të sigurohet edhe pamundësia e pagesës, paaftësia e plotë fizike që pasohet nga paaftësia për punë, e me radhë. Kjo, në varësi të kërkesave të vetë klientit.
Si shkohet te kjo marrëveshje dhe a funksionon kudo njëlloj?
Ky lloj sigurimi funksionon njëlloj kudo ku parimi i sigurimit funksionon.
Kudo në Botën Perëndimore ku funksionon tregu i lirë është njëlloj. PPI-ja nuk është shqiptare.
Marrëveshja shihet si trepalëshe: personi që merr kredinë, banka që e jep kredinë dhe kompania e sigurimit.
PPI-ja sjell mbrojtjen e trefishtë:
Niveli i parë: Banka kërkon mbrojtjen e kredisë dhe e gjen përmes PPI-së.
Niveli i dytë: Klienti kërkon mbrojtjen e familjes dhe trashëgimin pa probleme dhe barra borxhesh të pasurisë dhe këtë e ka të mundur përmes PPI-së.
Niveli i tretë: Shoqëria e sigurimit merr përsipër riskun kundrejt primit të sigurimit dhe siguron një treg për të ofruar produktet e saj.
PPI-ja, ose sigurimi i jetës së depozitorit, nuk duhet parë thjesht si një kusht bankar për të siguruar financim.
PPI-ja është një mekanizëm mbrojtjeje, në tre nivele: mbron familjen, mbron bankën, mbron edhe ekonominë.
Në këtë mënyrë një fatkeqësi personale, nuk kthehet në traumë për një bankë dhe as në një ortek financiar për sistemin ekonomik. E gjitha vijon mbarëvajtjen./ Sigurime.Online
