Mashtrimi financiar përmes kredive në institucione jobanka ka marrë një tjetër përmasë shqetësuese në Shqipëri.
Pas skemave famëkeqe të FINAL dhe MCA, rasti më i fundit që po trondit Lezhën përfshin të paktën 23 gra të mashtruara me kredi nga kompania IUTE Credit, përmes një skeme të ndërtuar nga Donika Curri, 33 vjeçe, e arrestuar dy ditë më parë nga policia.
Sipas hetimeve paraprake, Curri iu prezantohej grave në zonën e Zejmenit si përfaqësuese e një shoqate bamirësie për nëna me fëmijë të mitur. Ajo kërkonte kartat e identitetit me premtimin për ndihma financiare. Më pas, duke përdorur këto dokumente, realizonte aplikime për kredi në IUTE Credit në shuma që varionin nga 3 mijë deri në 5 mijë euro.
Burime të Skyweb.al konfirmojnë se mashtrimi shtrihet edhe në zona të tjera, përfshirë Shkodrën, dhe se denoncimet po shtohen nga ora në orë. Policia po heton për të zbuluar nëse janë tërhequr kredi edhe në institucione të tjera mikrokredie krahas IUTE Credit.
Skyweb.al ka siguruar biseda mes Curri-t dhe një prej grave të mashtruara, ku kjo e fundit i kërkon me ngulm të bëjë pagesat për kredinë e marra në emrin e saj. Nga ana tjetër, Curri telefonon vazhdimisht dhe shkruan mesazhe të tipit: “Të lutem, për hir të bebave, hape telefonin”, duke kërkuar të shmangë kallëzimin penal.
Policia deri në mesditën e 26 qershorit kishte identifikuar zyrtarisht 16 raste, por sipas Skyweb.al numri i grave të mashtruara deri dje pasdite ka arritur në 23. Një pjesë e mirë prej tyre janë nga i njëjti fshat – Zejmeni i Lezhës, që në mënyrë tragjike lidhet edhe me rastin e Pal Trashajt, burrit që dogji veten para SPAK, pasi nuk përballonte dot borxhin nga një kredi e papërballueshme.
E kontaktuar nga Skyweb.al, IUTE Credit mohoi të kishte dijeni për këto mashtrime dhe pretendoi se ka bërë kallëzim penal menjëherë pasi është informuar nga vetë viktimat. Kompania thotë se ka pezulluar kreditë përkatëse derisa të përfundojnë hetimet dhe të verifikohet nëse bëhet fjalë për mashtrime apo për kredi të marra me vullnet të lirë.
Çfarë po ndodh me sigurinë e mikrokreditimit në Shqipëri?
Rasti hedh dritë mbi një tjetër problem sistemik: mungesën e kontrollit në sektorin e mikrokreditimit, veçanërisht për aplikimet që bëhen online ose përmes aplikacioneve, ku niveli i verifikimit të kredimarrësit është minimal. Megjithëse Banka e Shqipërisë pas skandaleve të mëparshme shtrëngoi rregullat, rasti i IUTE Credit sugjeron se një pjesë e tregut vazhdon të funksionojë në mënyrë të pakontrolluar.
Rregullorja për administrimin e rrezikut në institucionet jobanka kërkon identifikim të qartë të kredimarrësit dhe vlerësim të aftësive paguese.
Nëse verifikohet se kreditë janë lëshuar vetëm përmes aplikacionit dhe pa u bërë verifikimi fizik i personit që mban emrin në kontratë, si edhe verifikimi i aftësive paguese të tij nga agjentët e kredidhënësit, siç parashikon rregullorja, atëherë përgjegjësia bie jo vetëm mbi autorin e mashtrimit, por edhe mbi institucionin financiar që nuk ka respektuar rregullat.
Ngjarja është ende në hetim dhe policia po kërkon të përcaktojë nëse Donika Curri ka vepruar e vetme apo në bashkëpunim me persona të tjerë. Gjithashtu, pritet të zbardhet nëse zyrtarë të IUTE Credit kanë ndihmuar apo neglizhuar në verifikimin e kredimarrësve. /skyweb.al
