Shkencëtarët në Korenë e Jugut kanë zhvilluar një metodë të re që mund ta kthejë llumin e kafesë në biokarburant cilësor në vetëm 90 sekonda.
Ekipi kërkimor nga Korea Institute of Geosciences and Mineral Resources dhe Daejeon University of Science and Technology përdori një trajtim termik me temperaturë mbi 800 gradë Celsius.
Procesi u aplikua mbi llumin e lagësht të kafesë, pa pasur nevojë që materiali të thahej më parë, siç ndodh zakonisht në teknikat e tjera të përpunimit të mbetjeve organike.
Sipas studiuesve, nxehtësia bën që lagështia brenda grimcave të avullojë me shpejtësi, duke krijuar presion të madh të brendshëm. Si pasojë, grimcat “shpërthejnë” nga brenda, në një proces të ngjashëm me kokoshkat.
Ky shpërthim krijon një strukturë poroze, të mbushur me kanale mikroskopike, që e bën më të lehtë kthimin e llumit të kafesë në biochar, një material që mund të përdoret për energji dhe që ka gjurmë më të ulët mjedisore se karburantet tradicionale.
Zbulimi është i rëndësishëm sepse çdo vit në botë prodhohen mbi 10 milionë tonë llum kafeje, nga konsumi i përditshëm i miliarda filxhanëve.
Një pjesë e madhe e këtyre mbetjeve përfundon në landfille, ku dekompozimi i tyre çliron gaze serrë të dëmshme për mjedisin.
Metoda e re shmang një nga pengesat kryesore të teknologjive të mëparshme: tharjen paraprake të materialit bimor, që kërkon shumë energji.
Kjo e bën procesin më të shpejtë dhe potencialisht më efikas për përdorimin e mbetjeve organike.
Nëse teknologjia zgjerohet në shkallë industriale, edhe një pjesë e vogël e llumit të kafesë mund të kthehet në burim energjie, në vend që të përfundojë në mbeturina.
Në këtë mënyrë, kafeja nuk do të mbetej vetëm një nga pijet më të konsumuara në botë, por edhe një burim i mundshëm për ekonomi qarkulluese dhe energji më të pastër./skyweb.al
