DPSHTRR, në bashkëpunim me Task Forcën e Transportit Rrugor dhe Policinë e Shtetit, ka nisur një plan të koordinuar kontrollesh në të gjithë vendin gjatë muajve korrik dhe gusht.
Në fokus të kontrolleve do të jenë automjetet që qarkullojnë me detyrime të papërmbushura, si mospagesa e taksës vjetore, moskryerja e kontrollit teknik apo mangësi të tjera në dokumentacion.
Këtë të martë, Task Forca u ndal në autostradën Tiranë-Durrës, ku dhjetëra automjete u verifikuan në kohë reale përmes mjetit inteligjent që evidenton statusin e tyre.
Sipas DPSHTRR-së, kontrollet do të zhvillohen në akset kryesore rrugore, me qëllim identifikimin e mjeteve që qarkullojnë në kundërshtim me detyrimet ligjore.
“Përmes përdorimit të mjetit inteligjent të Task Forcës do të bëhet identifikimi në kohë reale i mjeteve në lëvizje dhe verifikimi i statusit të tyre, duke evidentuar rastet e mospagesës së taksës vjetore, moskryerjes së kontrollit teknik, si dhe mangësi të tjera në dokumentacionin e mjeteve”, tha Erald Totri nga DPSHTRR.
Totri theksoi se qëllimi kryesor i këtij aksioni është ndërgjegjësimi i drejtuesve të mjeteve dhe jo ndëshkimi i tyre.
Sipas tij, pagesa e taksës vjetore dhe kryerja e kontrollit teknik nuk janë vetëm detyrime ligjore, por edhe elementë që lidhen drejtpërdrejt me sigurinë rrugore dhe administrimin korrekt të automjeteve.
“Kjo nismë synon, mbi të gjitha, rritjen e ndërgjegjësimit të drejtuesve të mjeteve për rëndësinë e përmbushjes në kohë të detyrimeve ligjore”, u shpreh Totri.
Kontrollet do të përqendrohen veçanërisht në akset me qarkullim të lartë, pasi periudha e verës shoqërohet me fluks të shtuar lëvizjesh në të gjithë vendin.
DPSHTRR u bën thirrje drejtuesve të automjeteve që të verifikojnë dhe të shlyejnë në kohë detyrimet ligjore, për të shmangur penalitetet dhe për të garantuar një qarkullim më të sigurt.
