Qytetarët që përfitojnë avokat falas nga shteti do të kenë të drejtë ta zgjedhin vetë avokatin që do t’i përfaqësojë. Kjo parashikohet në ndryshimet e reja të propozuara në ligjin për ndihmën juridike falas, të cilat i ka konsultuar skyweb.al.
Sot, avokati caktohet kryesisht me rotacion nga dhoma vendore e avokatisë. Me ligjin e ri, qytetari do të mund të zgjedhë nga lista e avokatëve që ofrojnë këtë shërbim.
Rotacioni do të përdoret vetëm kur qytetari nuk zgjedh, kur avokati refuzon ose kur nuk mund ta marrë përsipër çështjen. Ndryshimet zgjerojnë edhe listën e personave që përfitojnë ndihmë juridike falas, pavarësisht të ardhurave.
Në listë përfshihen viktimat e krimit dhe familjarët e tyre, viktimat e terrorizmit, personat që kërkojnë njohjen e statusit të aftësisë së kufizuar, përfituesit e ndihmës ekonomike dhe pensionit social.
Ndihmë falas do të marrin edhe romët dhe egjiptianët për çështje që lidhen me dokumentet dhe regjistrimin civil, si dhe personat që raportojnë shkelje të së drejtës së Bashkimit Evropian.
Për viktimat e dhunës, të miturit dhe rastet urgjente, avokati do të caktohet menjëherë. Në këto raste, gjyqtari do të vendosë pa vonesë dhe avokati duhet të nisë menjëherë mbrojtjen e personit.
Ligji i ri parashikon gjithashtu që, kur një çështje ka procese të lidhura civile, penale ose administrative, personi të përfaqësohet, sa të jetë e mundur, nga i njëjti avokat.
Procedura për të marrë ndihmë juridike falas do të bëhet më e thjeshtë. Qytetari do të paraqesë një vetëdeklarim dhe dokument identifikimi. Dokumente të tjera do të kërkohen vetëm kur ka dyshime mbi deklarimin.
Shteti do të mbulojë edhe disa shpenzime të tjera, si tarifat kadastrale, noteriale, tarifat e ekspertëve dhe shpenzimet që lidhen me zbatimin e vendimit të gjykatës. /skyweb.al
