YouTube vazhdon t’u rekomandojë adoleshentëve video që lidhen me çrregullimet e të ngrënit edhe një vit pasi u vendosën rregulla të reja për të kufizuar përmbajtjen e dëmshme në internet, sipas një studimi të ri, shkruan BBC.
Qendra për Luftimin e Urrejtjes Dixhitale (Centre for Countering Digital Hate – CCDH) krijoi një llogari të simuluar të një vajze 13-vjeçare, e cila shikonte për herë të parë përmbajtje të pasigurta që lidhen me dietat dhe imazhin trupor.
Studimi zbuloi se një në dhjetë videot e rekomanduara nga algoritmi “Up Next” i YouTube përmbanin materiale si promovimi i dobësisë ekstreme (“thinspiration”), kufizimi ekstrem i kalorive ose përmbajtje të tjera të dëmshme, megjithëse situata është përmirësuar krahasuar me dy vitet e fundit.
Google, kompania që zotëron YouTube, deklaroi se ka një angazhim “të palëkundur” për të ndaluar përhapjen e përmbajtjeve të dëmshme dhe se videot e përmendura në raport janë hequr nga platforma.
Këto gjetje vijnë pasi rregullatori britanik i telekomunikacionit, Ofcom, deklaroi se YouTube dhe TikTok ende nuk po bëjnë mjaftueshëm për të garantuar sigurinë e të rinjve dhe kërkoi masa mbrojtëse më të forta.
Në korrik të vitit 2025 hyri në fuqi një pjesë kyçe e Ligjit për Sigurinë në Internet (Online Safety Act) të qeverisë britanike. Sipas këtij ligji, platforma si YouTube kanë tani detyrimin ligjor të mbrojnë të miturit nën moshën 18 vjeç nga përmbajtje të rrezikshme, përfshirë videot që nxisin ose promovojnë vetëvrasjen, vetëlëndimin dhe çrregullimet e të ngrënit.
Platformat duhet gjithashtu të vlerësojnë mënyrën se si funksionojnë algoritmet e tyre – programet kompjuterike që rekomandojnë përmbajtje të re për përdoruesit – dhe të marrin masa për të zvogëluar çdo rrezik që ato mund të paraqesin për të rinjtë.
Nëse kompanitë nuk i zbatojnë këto detyrime, ato mund të gjobiten deri në 10% të të ardhurave të tyre globale, një shumë që, në rastin e YouTube, mund të arrijë në miliarda paund.
