Anglia po përballet me një “rritje shqetësuese” të numrit të grave të reja në të 20-at që zhvillojnë diabet të tipit 2, kanë paralajmëruar ekspertët e Imperial College London.
Rritja është vërejtur kryesisht pas pandemisë së COVID-19 dhe lidhet ngushtë me shtimin e rasteve të obezitetit, sipas një analize të të dhënave të Shërbimit Kombëtar Shëndetësor britanik (NHS) për periudhën 2011–2024.
Diabeti i tipit 2 është një sëmundje serioze që mund të çojë në komplikacione të rënda, si infarkti i zemrës dhe goditja në tru.
Kur sëmundja shfaqet në moshë të re, ajo priret të jetë më agresive, duke rritur rrezikun e komplikacioneve të rënda dhe duke shkurtuar jetëgjatësinë, sipas organizatës Diabetes UK.
Paralajmërimi i hershëm
Sipas organizatës bamirëse, është jetike që personat në rrezik të diagnostikohen herët për të parandaluar dëmtimet afatgjata të organeve.
Diabeti i tipit 2 mund të futet në remision në disa raste përmes një diete të shëndetshme dhe mbajtjes së një peshe normale, pa qenë e nevojshme përdorimi i ilaçeve që ulin nivelin e glukozës në gjak.
Studiuesit thonë se trajtimet më të reja kundër obezitetit, si injeksionet dhe tabletat me agonistë të receptorit GLP-1, mund të ndihmojnë, së bashku me këshillat për një ushqyerje të shëndetshme.
Rreth 90% e gjashtë milionë personave që jetojnë me diabet në Mbretërinë e Bashkuar vuajnë nga diabeti i tipit 2 dhe jo nga diabeti i tipit 1, i njohur edhe si diabet insulinovartës.
Rreziku për zhvillimin e diabetit rritet me moshën dhe të moshuarit vazhdojnë të përbëjnë pjesën më të madhe të rasteve të reja të diagnostikuara.
Megjithatë, sipas vlerësimeve të NHS England, rreth 12 mijë persona nën moshën 30 vjeç jetojnë aktualisht me diabet të tipit 2, ndërsa gratë përbëjnë një pjesë më të madhe të këtyre rasteve tek të rinjtë.
Simptomat më të zakonshme përfshijnë lodhje të vazhdueshme, urinim më të shpeshtë se zakonisht dhe etje të vazhdueshme.
Studiuesit e Imperial College analizuan të dhënat e Auditit Kombëtar të Diabetit në Angli për të studiuar ndryshimet e sëmundjes ndër vite.
Të dhënat tregojnë se rastet e diabetit të tipit 2 janë në një rënie të lehtë tek të rriturit më të moshuar, të cilët megjithatë vazhdojnë të përbëjnë pjesën më të madhe të diagnozave të reja.
Nga ana tjetër, sëmundja po rritet me shpejtësi tek personat nën moshën 40 vjeç, ndërsa disa nga rritjet më të mëdha janë regjistruar tek gratë e moshës 20 deri në 29 vjeç.
Në të njëjtën kohë, indeksi i masës trupore (BMI), një tregues i obezitetit, në momentin e diagnostikimit është rritur më shpejt tek të rriturit e rinj sesa tek grupmoshat më të mëdha, duke sugjeruar se obeziteti është një nga shkaqet kryesore të këtij trendi.
Shkalla e obezitetit në Angli është përkeqësuar që pas pandemisë, ku sipas të dhënave të veçanta të NHS, pothuajse një në tre persona është tashmë obez.
Rritjet më të mëdha të obezitetit janë regjistruar pikërisht tek të rriturit e rinj.
Midis viteve 2019 dhe 2025, numri i rasteve të reja të obezitetit u rrit me 16% tek personat e moshës 20–29 vjeç dhe me gati 20% tek ata të moshës 30–39 vjeç, ndërsa normat ranë tek të rriturit e moshës 60–79 vjeç.
