Ministria e Drejtësisë i ka përcjellë autoriteteve franceze dokumentacionin për ekstradimin në Shqipëri të biznesmenit Ermal Beqiri.
Burime pranë Prokurorisë së Posaçme bëjnë me dije se SPAK i kishte kërkuar ministrisë dërgimin e kërkesës zyrtare pranë organeve ligjzbatuese të Francës.
Dosjes së ekstradimit i është bashkëngjitur edhe vendimi i Gjykatës së Posaçme, e cila ka caktuar ndaj Beqirit masën e sigurisë “arrest në burg”.
Ai dyshohet nga SPAK për përfshirje në shtatë vepra penale që lidhen me hetimet për tenderët e Agjencisë Kombëtare të Shoqërisë së Informacionit.
Ermal Beqiri u arrestua disa ditë më parë në Francë, pasi u ndalua gjatë një fluturimi me avion privat mbi një central.
SPAK ka njoftuar gjithashtu se u ka kërkuar autoriteteve franceze sekuestrimin e disa pasurive që dyshohet se kanë origjinë kriminale.
Mes pasurive përfshihen llogari bankare me vlerë totale mbi 2 milionë euro, dy apartamente, automjete dhe një kështjellë në departamentin Oise, e vlerësuar rreth 2.6 milionë euro.
Ndaj Beqirit janë ngritur dyshime për “Konkurrencë të paligjshme nëpërmjet dhunës”, “Heqje të paligjshme të lirisë” dhe “Shkelje të barazisë së pjesëmarrësve në tenderë apo ankande publike”.
Ai hetohet gjithashtu për veprat penale që lidhen me grupin e strukturuar kriminal, pastrimin e produkteve të veprës penale dhe korrupsionin aktiv të personave që ushtrojnë funksione publike.
Pas dorëzimit të dokumentacionit, kërkesa për ekstradim pritet të shqyrtohet nga autoritetet dhe gjykatat franceze./skyweb.al
