Kremi i diellit është një nga produktet që nuk mungon në valixhen e pushimeve, por shpesh në shtëpi mbeten shishe të hapura nga vera e kaluar. Pyetja është nëse mund të përdoren sërish apo nëse mbrojtja e tyre ndaj rrezeve UV është dobësuar.
Sipas Administratës Amerikane të Ushqimit dhe Barnave (FDA), kremrat kundër diellit zgjasin më shumë nga sa mendohet zakonisht. Produktet që nuk kanë të shënuar një datë skadence duhet të konsiderohen të vlefshme për rreth tre vjet nga momenti i blerjes, pasi prodhuesit duhet të provojnë se formula e tyre mbetet e qëndrueshme për të paktën këtë periudhë.
Kjo do të thotë se një krem dielli i blerë verën e kaluar, nëse është ruajtur siç duhet dhe nuk ka kaluar datën e skadencës, në përgjithësi mund të përdoret edhe këtë vit. Problemi lind kur produkti është shumë i vjetër, nuk dihet se kur është blerë ose ka ndryshuar pamje, aromë apo strukturë.
FDA rekomandon të mos përdoren produktet që kanë kaluar datën e skadencës, si dhe kremrat pa datë skadence që janë blerë më shumë se tre vjet më parë. Me kalimin e kohës, përbërësit aktivë mund të degradojnë dhe kremi të mos ofrojë më nivelin e mbrojtjes të deklaruar.
Shenja të tjera që tregojnë se produkti duhet hedhur janë ndryshimi i ngjyrës, aroma e pazakontë, ndarja e përbërësve apo një strukturë tepër e ujshme. Në disa kremra mineralë mund të krijohen edhe kokrriza. Një produkt i degraduar jo vetëm që mund të mos mbrojë siç duhet nga dielli, por mund të shkaktojë edhe irritim të lëkurës.
Po aq e rëndësishme është mënyra e ruajtjes. Ekspozimi i vazhdueshëm ndaj temperaturave të larta dhe diellit mund të përshpejtojë degradimin e produktit. Në plazh rekomandohet që kremi të mbahet në hije, i mbështjellë me një peshqir ose në një çantë termike, ndërsa kapaku duhet të mbyllet mirë pas çdo përdorimi.
Ekspertët theksojnë gjithashtu se një shishe kremi dielli nuk duhet të zgjasë domosdoshmërisht gjatë gjithë verës nëse përdoret në sasinë e rekomanduar. Sipas Mayo Clinic, për zonat e ekspozuara të trupit nevojiten rreth 30 ml për një aplikim, afërsisht sa sasia që mban një gotë e vogël “shot”.
Aplikimi duhet të përsëritet çdo një deri në dy orë gjatë ekspozimit në diell dhe veçanërisht pas notit, djersitjes apo fshirjes me peshqir. Ri-aplikimi nuk rrit nivelin e mbrojtjes së kremit, por ndihmon që ai të ruhet gjatë gjithë kohës së ekspozimit.
Përdorimi i një kremi të skaduar mund të rrisë rrezikun për djegie nga dielli dhe dëmtime të lëkurës, pasi mbrojtja ndaj rrezeve UVA dhe UVB mund të mos jetë më ajo e deklaruar.
Pra, kremi i vitit të kaluar nuk duhet hedhur automatikisht: nëse nuk ka skaduar, është ruajtur mirë dhe nuk ka ndryshuar ngjyrë, erë apo konsistencë, mund të vazhdojë të përdoret. Nëse nuk dihet mosha e produktit ose ka shenja degradimi, rekomandimi është të zëvendësohet.
