Nuk është më vetëm destinacioni apo çmimi që përcakton zgjedhjen e pushimeve. Gjithnjë e më shumë udhëtarë po kërkojnë vende që i lidhin me fëmijërinë, historinë familjare dhe një periudhë të jetës që kujtohet si më e thjeshtë dhe e lumtur.
Kthimi në fshatin e gjyshërve, në ishullin ku kalonin verën ose në plazhin e fëmijërisë po shndërrohet në një tendencë të re turistike, veçanërisht mes “Millennials”, personave të lindur nga viti 1981 deri më 1996.
Këta udhëtarë nuk kërkojnë thjesht një vend për të pushuar, por duan të rizbulojnë shijet, aromat dhe pamjet që kanë lënë gjurmë në kujtesën e tyre.
Një studim i grupit hotelier francez Accor, në bashkëpunim me kompaninë Globetrender, tregoi se një në katër pjesëmarrës nuk e zgjidhte udhëtimin vetëm në bazë të destinacionit, por sipas ndjesisë që i krijonte ideja e rikthimit atje. Nostalgjia u rendit ndër tendencat më të forta të udhëtimeve.
Për personat që tashmë kanë krijuar familjet e tyre, rikthimi në vendet e fëmijërisë është edhe një mënyrë për t’u treguar fëmijëve se si i kalonin dikur pushimet prindërit e tyre. Synimi është që kujtimet dhe traditat familjare të ruhen edhe për brezat e ardhshëm.
Në forcimin e kësaj tendence kanë ndikuar edhe rrjetet sociale, ku fotografitë me filtra retro dhe pamjet e jetës së thjeshtë e paraqesin të kaluarën në mënyrë të idealizuar.
Një studim i publikuar në revistën shkencore “Sustainability” thekson se turizmi nostalgjik lidhet si me kujtesën personale, ashtu edhe me atë kolektive. Vizitat në shtëpitë ku njerëzit janë rritur, shkollat e vjetra apo vendet ku kanë ndodhur ngjarje të rëndësishme i ndihmojnë udhëtarët të rigjejnë ndjesinë e përkatësisë dhe identitetit.
Sipas një sondazhi të Talker Research, të publikuar nga “New York Post”, nostalgjia ndikoi në vitin 2026 te zgjedhja e destinacionit për 53% të pjesëmarrësve. Ajo ndikoi gjithashtu te aktivitetet e planifikuara për 50% dhe te përzgjedhja e shoqëruesve të udhëtimit për 30%.
Rreth 43% e të anketuarve thanë se këto udhëtime i rikthenin në periudha më të lumtura. Për 35% ato ndikonin pozitivisht në shëndetin mendor, 31% ndiheshin më pranë familjes dhe 30% krijonin një lidhje më të fortë me njerëzit e dashur.
Paralelisht po rriten edhe udhëtimet në kërkim të prejardhjes familjare. Sipas “Forbes”, shumë amerikanë po vizitojnë fshatrat e paraardhësve në vende si Irlanda dhe Italia, duke kërkuar në arkivat vendore të dhëna për plotësimin e pemës familjare.
Kjo prirje favorizon edhe destinacionet më pak të njohura, të paprekura nga turizmi masiv dhe që nuk promovohen vazhdimisht nga algoritmet e rrjeteve sociale.
Turizmi nostalgjik tregon se pushimet nuk kanë nevojë të mbushen me aktivitete. Ndonjëherë mjafton rikthimi në një plazh të njohur, në shtëpinë e gjyshërve apo në rrugën e dikurshme për të rigjetur, qoftë edhe për pak çaste, ndjesinë e fëmijërisë. /skyweb.al
