Autoritetet e Nepalit u kanë kërkuar kompanive që menaxhojnë platformat Meta dhe TikTok të marrin masa të menjëhershme për heqjen e përmbajtjeve grafike, videove të krijuara me inteligjencë artificiale, kodeve të rreme QR për donacione dhe postimeve çorientuese që po qarkullojnë pas përmbytjeve dhe rrëshqitjeve shkatërruese të dheut.
Sipas The Kathmandu Post, zyrtarët qeveritarë zhvilluan takime me përfaqësuesit e platformave sociale në Nepal, duke kërkuar reagim më të shpejtë ndaj materialeve që mund të keqinformojnë publikun, të pengojnë operacionet e shpëtimit dhe ndihmës, apo t’u shkaktojnë vuajtje të mëtejshme familjeve të viktimave.
Bijay Kumar Roy, koordinator i grupit të punës së qeverisë për rregullimin dhe menaxhimin e mediave sociale, tha se kompanive u është kërkuar të heqin menjëherë përmbajtjet e papërshtatshme dhe mashtruese sapo ato të raportohen.
Autoritetet kërkuan gjithashtu që platformat të përmirësojnë sistemet algoritmike, në mënyrë që ato të jenë më proaktive në identifikimin dhe bllokimin e materialeve të rreme dhe pamjeve grafike.
Sipas zyrtarëve, në rrjetet sociale janë rikthyer pamje të vjetra, të cilat po paraqiten gabimisht si materiale nga katastrofa e fundit. Paralelisht, video dhe imazhe të gjeneruara me inteligjencë artificiale po publikohen si të ishin reale. Një tjetër shqetësim janë kodet e rreme QR, përmes të cilave kërkohen donacione në emër të viktimave të përmbytjeve.
Raporti thekson se Meta dhe TikTok aktualisht mund të marrin nga 24 deri në 48 orë për të reaguar ndaj përmbajtjeve të raportuara. Për këtë arsye, autoritetet kanë kërkuar që procesi i verifikimit dhe heqjes së materialeve mashtruese të përshpejtohet.
Kërkesa e qeverisë nepaleze vjen në një moment kur numri i përgjithshëm i viktimave nga përmbytjet në Nepal dhe Kinë ka arritur në 543, ndërsa 1.281 persona, mes tyre 856 shtetas të huaj, rezultojnë ende të zhdukur.
Përmbytjet dhe rrëshqitjet e dheut goditën të mërkurën pjesë të veriut dhe qendrës së Nepalit, veçanërisht komunitetet përgjatë lumenjve Bhotekoshi dhe Trishuli. Fatkeqësia shkaktoi dëme të mëdha në banesa, ura dhe rrugë.
Në anën kineze të kufirit, rrjedhat e baltës dhe mbeturinat goditën portin Gyirong, në qarkun me të njëjtin emër, në Rajonin Autonom Xizang të Kinës jugperëndimore, i njohur gjithashtu si Tibet. Përmbytjet ndërprenë rrugët, komunikimet dhe furnizimin me energji elektrike.
Qindra banorë, punëtorë ndërtimi dhe turistë nga zonat e prekura të qarkut Gyirong janë evakuuar drejt vendeve më të sigurta, ndërsa ekipet e shpëtimit vijojnë operacionet e kërkimit për personat e zhdukur.
