Barazia gjinore në tregun e punës mbetet ende me sfida në Shqipëri. Sipas të dhënave të publikuara nga INSTAT, pjesëmarrja në tregun e punës mbetet më e lartë për burrat (82,3 %) krahasuar me gratë (69,3 %) në grupmoshën aktive 15–64 vjeç, çka reflekton ende një hendek të dukshëm në përfshirjen ekonomike.
Dallime ka edhe në strukturën e punësimit sipas statusit: mbi gjysma e grave (51,2 %) janë të punësuara me pagë, ndërkohë që një pjesë e konsiderueshme (28,5 %) mbeten të angazhuara si punëtore pa pagesë në bizneset familjare, duke sinjalizuar vështirësi për të hyrë në tregun formal të punës.
Në aspektin sektorial, bujqësia vazhdon të jetë fusha ku punësohet pjesa më e madhe e grave (41,5 % në vitin 2024), ndërsa tregtia, transporti, hoteleria dhe shërbimet administrative përfaqësojnë sektorin e dytë më të rëndësishëm, duke përfshirë 22,6 % të grave dhe 28,3 % të burrave.
Detyrat shtëpiake janë ndër arsyeët bkryesore të mospërfshirjes së grave në tregun e punës. Ky fakt tregon ndikimin e roleve tradicionale familjare në kufizimin e mundësive të grave për pjesëmarrje të plotë në tregun e punës.
Një tjetër aspect është niveli arsimor. Rreth gjysma e grave dhe burrave të papunë kanë arsim 8 apo 9-vjeçar, duke sugjeruar një lidhje të fortë mes mungesës së arsimimit të lartë dhe vështirësive për punësim. Sa i përket mbrojtjes sociale, të dhënat tregojnë përqindje të larta të grave në përfitimin e pensioneve rurale (63,7 %), duke reflektuar strukturën e popullsisë dhe rolin e tyre tradicional në zonat bujqësore. /Skyweb.al
