Boeing mund të sigurojë një nga porositë më të mëdha të dekadës, pasi Turkish Airlines po shqyrton blerjen e deri në 250 avionëve të rinj.
Negociatat zhvillohen teksa Presidenti Rexhep Tayyip Erdoğan ndodhet në Uashington, të parën që prej vitit 2019, ku pritet të dominojnë marrëveshjet tregtare dhe ato të mbrojtjes.
Presidenti amerikan Donald Trump ka deklaruar se pret një “blerje në shkallë të gjerë të avionëve Boeing” përkrah diskutimeve mbi shitjen e avionëve F-16 dhe rikthimin e mundshëm në programin F-35.
Turkish Airlines, që operon aktualisht gati 400 avionë, synon të dyfishojë flotën në 800 deri në vitin 2033.
Pas kontratës së vitit të kaluar për 220 avionë Airbus, kompania turke po shqyrton tani modelet Boeing 737 MAX dhe 787 Dreamliner si pjesë të zgjerimit të saj. Kryetari i bordit, Ahmet Bolat, ka theksuar se gjithçka do të varet nga mundësitë e dorëzimit, duke lënë Airbus si alternativë në rast se Boeing nuk garanton afatet.
Në frontin e mbrojtjes, Turqia u përjashtua nga programi F-35 pas blerjes së sistemit rus S-400, por Presidenti Erdoğan ka nënvizuar se një marrëveshje me Uashingtonin është e arritshme.
Kjo vizitë e nivelit të lartë mund të përcaktojë fatin e kontratave më të rëndësishme të Boeing, si në aviacionin civil, ashtu edhe në atë ushtarak. /skyweb.al
