ROMË – Italia dhe Greqia kanë arritur një marrëveshje paraprake për shitjen e dy fregatave të klasit FREMM, aktualisht në shërbim të marinës italiane.
Drejtuesit ushtarakë të të dy vendeve nënshkruan të hënën marrëveshjen për transferimin e fregatës “Bergamini”, me funksion të përgjithshëm, dhe “Fasan”, e specializuar kundër nëndetëseve.
Të dyja anijet u ndërtuan nga gjiganti shtetëror italian Fincantieri dhe i janë bashkuar flotës italiane që prej vitit 2013.
Fincantieri do të administrojë procesin e shitjes dhe paketën e mbështetjes teknike.
Mediat greke raportojnë se secila fregatë do të kushtojë rreth 300 milionë euro, duke e çuar vlerën totale të marrëveshjes në 600 milionë euro.
Avantazhi kryesor i këtij transaksioni lidhet me kohën e shpejtë të dorëzimit.
Në vend që të pritet ndërtimi i anijeve të reja, Athina do të marrë fregatat brenda një periudhe shumë më të shkurtër, në një moment kur tensionet ushtarake në Mesdhe dhe rivaliteti me Turqinë janë rritur ndjeshëm.
Ky nuk është rasti i parë që Italia përdor këtë formulë.
Në vitet e fundit, Roma ka shitur anije të destinuara për flotën e saj edhe Indonezisë dhe Egjiptit, duke i zëvendësuar më pas me porosi të reja për marinën italiane.
Në rastin e Greqisë, boshllëku që do të krijohet në flotën italiane do të mbushet me porositë për dy fregata të reja të tipit FREMM “Evo”, më të avancuara, që do t’i dorëzohen marinës italiane në vitet në vijim. /skyweb.al
