Prokuroria e Posaçme kundër Korrupsionit dhe Krimit të Organizuar ka njoftuar se zëvendëskryeministrja dhe ministrja e Infrastrukturës dhe Energjisë, Belinda Balluku, është marrë zyrtarisht si e pandehur në lidhje me procedurat e tenderit të tunelit të Llogarasë.
Sipas njoftimit zyrtar të SPAK, ndaj Ballukut është ngritur akuza për veprën penale “Shkelje e barazisë së pjesëmarrësve në tendera apo ankande publike”, parashikuar nga neni 258 i Kodit Penal, në bashkëpunim me persona të tjerë, në bazë të neneve 258/2 dhe 25 të Kodit Penal.
Hetimi po zhvillohet në kuadër të procedimit penal nr. 136 të vitit 2025, i bashkuar me dy procedime të tjera të hapura në vitin 2024 (nr. 167 dhe 181).
Objekt i hetimit janë veprimet e kryera nga Balluku në cilësinë e ministres, lidhur me procedurën e prokurimit për “Ndërtimin e tunelit të Llogarasë”, pjesë e segmentit rrugor Orikum–Himarë të autostradës SH8 (Vlorë–Sarandë).
Sipas SPAK, tenderi fillestar ishte zhvilluar më 11 dhjetor 2020, ndërsa pas anulimit të tij, procedura u rihap më 22 qershor 2021, me një fond limit prej 18.96 miliardë lekësh pa TVSH.
Balluku është njoftuar zyrtarisht për akuzën më 21 tetor 2025, përmes shkresës nr. 37398. Pas kërkesës së saj për shtyrje, SPAK ka përcaktuar datën 31 tetor 2025, ora 15:00, për paraqitjen e saj pranë organit procedues.
Ky është zhvillimi më i fundit në hetimin e SPAK për tenderin e Llogarasë, një nga projektet më të mëdha infrastrukturore të qeverisë, i cili ka qenë prej kohësh në qendër të debatit publik për transparencën e procedurave dhe kostot e larta të ndërtimit./skyweb.al
