Një monedhë floriri e vitit 1609 është shpallur tashmë si monedha më e shtrenjtë e shitur ndonjëherë në Europë.
Ajo u shit të hënën në një ankand në Gjenevë për 3.4 milionë dollarë. Monedha peshon 339 gramë dhe u emetua në Spanjë gjatë sundimit të mbretit Filip III. Kjo monedhë e rrallë, e njohur si Centen, u prodhua në fabrikën e monedhave në Segovia, duke përdorur ar të sjellë nga pushtimet spanjolle në Amerikë. Ajo u krijua si simbol i fuqisë dhe pasurisë mbretërore dhe kishte vlerën e disa pagave vjetore të kohës. Sipas themeluesit të Numismatica Genevensis, ku u zhvillua ankandi, Centen-i konsiderohet monedha më e madhe e prodhuar ndonjëherë në historinë moderne evropiane.
E zhdukur për disa shekuj, monedha u rishfaq në Shtetet e Bashkuara në vitet 1950, ku u ble nga një koleksionist nga Nju Jorku, i cili më vonë ia shiti një blerësi spanjoll.
Rekordi i mëparshëm për monedhën më të vlefshme europiane mbahej nga një 100 dukatësh i Perandorit të Shenjtë Romak, Ferdinand III, i cili ishte shitur për 2.42 milionë dollarë.
