Fluturimi W95002 i Wizz Air, i nisur nga Londra Luton drejt Tiranës më datë 20 nëntor, u detyrua të kthehej urgjentisht në aeroportin e nisjes teksa ndodhej mbi Mynih. Ngjarja ndodhi në mesditë dhe, me kalimin e orëve, situata u bë edhe më e paqartë, pasi kompania nuk ofroi asnjë shpjegim të plotë për shkakun real të devijimit.
Skyweb.al, i cili prej ditësh ka tentuar të marrë informacion të verifikuar, është përballur me bllokadë totale nga Wizz Air.
Kompania që zakonisht reagon me shpejtësi kur kritikohet për trajtimin çnjerëzor të pasagjerëve, këtë herë ka zgjedhur heshtjen, duke lënë të hapur dyert për spekulime dhe duke krijuar një standard të dyfishtë në marrëdhënien me median dhe publikun: Flasin dhe kërcënojnë me gjyqe kur duan të mbrojnë imazhin dhe heshtin kur duan të fshehin diçka.
Çfarë po fsheh Wizz Air?!
Skyweb.al kontaktoi edhe Albcontrol-in për të marrë informacion zyrtar mbi shkakun e devijimit dhe gjendjen e pasagjerëve që raportohet se humbën ndjenjat në bord, por institucioni shqiptar sqaroi se ngjarja u menaxhua nga autoritetet britanike dhe se vetëm ato zotërojnë të dhënat.
Në kërkim të transparencës, Skyweb.al iu drejtua edhe aeroportit të Lutonit dhe autoriteteve vendase, por përgjigjja ishte e njëjtë: informacionin e jep vetëm Wizz Air.
Pavarësisht kërkesave të përsëritura drejtuar përfaqësuesve të kompanisë në Tiranë dhe qendrës në Budapest, Wizz Air mbajti një heshtje të plotë dhe nuk dha asnjë detaj.
Kjo qasje e pazakontë ka ngritur dyshime serioze, duke bërë që incidenti të interpretohet si potencialisht më i rëndë nga ç’është shpallur.
Ajo që dihet deri tani është se pesë pasagjerë humbën ndjenjat papritur në një lartësi prej rreth 11 mijë metrash, ndërsa pas uljes në Luton avioni u rrethua nga disa autoambulanca, çka sinjalizon një emergjencë të rëndësishme mjekësore.
Fillimisht Wizz Air pranoi vetëm se “kishte një incident mjekësor” dhe se siguria e pasagjerëve është prioriteti i tyre, por refuzoi në mënyrë kategorike të jepte detaje të tjera.
Kur Skyweb.al pyeti nëse pasagjerët e sëmurë ishin të një familjeje, një element kyç për të kuptuar nëse mund të ketë qenë helmim, kompania zgjodhi të mos përgjigjet.
Sipas informacionit paraprak, dy skenarët më të mundshëm janë hipoksia si rezultat i një problemi me presionin e kabinës, apo një formë helmimi.
Hipoksia ndodh kur presioni në kabinë bie për një moment dhe trupi merr më pak oksigjen, duke shkaktuar marramendje, zbehje dhe të fikët. Në raste të tilla, devijimi është praktikë standarde, por kompanitë zakonisht japin shpjegime të detajuara për të shmangur panikun dhe spekulimet.
Por Wizz Air, ndryshe nga standardet ndërkombëtare të transparencës në aviacionin civil, ka zgjedhur të mbyllë çdo kanal komunikimi. Kjo heshtje e pazakontë dhe e pajustifikuar vetëm sa shton dyshimet se diçka më shumë ka ndodhur në bordin e fluturimit.
Aviacioni civil funksionon vetëm bazuar mbi sigurinë dhe besimin, dhe këto të dyja ekzistojnë vetëm kur ka transparencë.
Skyweb.al, si portal i specializuar në çështjet e Aviacionit Civil, do të vijojë të ndjekë çështjen dhe të kërkojë shkaqet reale të incidentit, i cili po bëhet gjithnjë e më intrigues për shkak të heshtjes së kompanisë.
Diçka nuk shkon në mënyrën si po menaxhohet kjo ngjarje, dhe publiku meriton të dijë të vërtetën. /skyweb.al
