Në një deklaratë që shënon një ndryshim të qasjes ndaj mbështetjes për bujqësinë, Kryeministri Edi Rama u ka sugjeruar fermerëve shqiptarë që të mos presin më subvencione nga shteti, por të organizohen në shoqëri të përbashkëta dhe të aplikojnë për kredi me garanci sovrane. Deklarata u bë gjatë një takimi me fermerë dhe sipërmarrës në Bashkinë e Cërrikut.
“Me subvencione nuk shkojmë larg, thjesht mbijetojmë,” tha Rama. Ai theksoi se mundësia më e mirë për zhvillimin e bujqësisë qëndron te krijimi i formave të bashkëpunimit mes fermerëve dhe pushtetit vendor, të cilat mund të përfitojnë nga një linjë kredie prej 250 milionë eurosh e ofruar nga Banka e Shqipërisë, me garanci shtetërore.
“Bashkia duhet të jetë e para forcë e interesuar që me këta njerëz të ulet dhe të bëjë një projekt për të ndërtuar një shoqëri të përbashkët dhe të marrë kredi të garantuar nga shteti,” shtoi kryeministri.
Thirrja e Ramës vjen në një kohë kur prej dy ditesh nuk ka fonde IPARD dhe nuk dihet ende çfarë do të ndodhë për 2026.
Këto fonde të rëndësishme të Bashkimit Europian për zhvillimin rural janë ndërprerë pas hetimeve të OLAF, zyra europiane kundër mashtrimit, e cila ka zbuluar nivel të lartë korrupsioni dhe shpërdorimi në menaxhimin e fondeve bujqësore në Shqipëri.
Mungesa e aksesit në financime europiane ka rritur presionin mbi fermerët vendas, të cilët përballen me mungesë të theksuar investimesh, rritje të kostove dhe pamundësi konkurrimi në tregjet rajonale.
Në këto kushte, thirrja e Kryeministrit për të kaluar nga subvencionet te kreditë me garanci shtetërore shihet si një ndryshim strategjik. Mbetet për t’u parë nëse fermerët do të jenë në gjendje të organizohen dhe të marrin përsipër barrën e huamarrjes, në një sektor që shpesh operon në kufijtë e mbijetesës. /skyweb.al
