Nëse prindërit ju kanë qortuar ndonjëherë pse flini më gjatë të shtunën apo të dielën, tashmë keni një justifikim shkencor!
Një studim i prezantuar në Kongresin e Shoqatës Europiane të Kardiologjisë tregon se ata që “rikuperojnë” gjumin e munguar gjatë fundjavës, kanë deri në 20% më pak rrezik për sëmundje të zemrës, sidomos kur u mungon gjumi gjatë javës.
Studimi analizoi të dhënat e afërisht 91,000 pjesëmarrësve nga databaza britanike UK Biobank dhe arriti në përfundimin se edhe një gjumë më i gjatë vetëm gjatë fundjavës mund të ulë rreziqet kardiovaskulare të shkaktuara nga mungesa kronike e gjumit gjatë javës.
Shkencëtarët sqarojnë se gjumi i fundjavës nuk e “fshin” plotësisht dëmin që i bëjmë trupit duke fjetur pak gjatë ditës së punës, por ndihmon, duke ulur inflamacionin, përmirësuar shëndetin dhe ndoshta edhe zgjatur jetën, siç konfirmojnë studime të tjera.
Megjithatë, ekspertët paralajmërojnë se të flesh rregullisht më pak se 7 orë në natë rrit rrezikun për tension të lartë, diabet dhe obezitet, të gjitha këto faktorë që ndikojnë në sëmundjet e zemrës.
Pra, edhe pse gjumi i fundjavës nuk është një “kurë magjike”, ai duket se vepron si një mburojë e vogël mbrojtëse në një botë ku mungesa e gjumit është kthyer në normë.
Burimi: Universiteti i Arizonës, “Catching up on sleep on weekends may lower heart disease risk by up to 20%” (2024)
