Snapchat bëri të ditur të hënën se ka bllokuar ose çaktivizuar rreth 415 mijë llogari të përdoruesve nën moshën 16 vjeç në Australi gjatë dy muajve të fundit, pas hyrjes në fuqi të një ligji të ri që ndalon përdorimin e platformës nga kjo grupmoshë.
Kompania tha se procesi i mbylljes së llogarive vijon çdo ditë, por paralajmëroi për kufizimet e teknologjisë së përdorur për vlerësimin e moshës. Sipas Snapchat, mjetet aktuale kanë një diferencë gabimi prej dy deri në tre vjet, çka mundëson që disa përdorues nën moshën e lejuar ta anashkalojnë sistemin, ndërsa të tjerë mbi 16 vjeç të bllokohen gabimisht.
Snapchat ka propozuar që autoritetet australiane të kërkojnë verifikim të moshës para shkarkimit të aplikacioneve, një ide që ka gjetur mbështetje edhe nga drejtori ekzekutiv i Meta, Mark Zuckerberg. Kompania ka kritikuar gjithashtu ligjin australian, duke argumentuar se ndalimi nuk e bën domosdoshmërisht më të sigurt apo më të lumtur përdorimin e platformës për adoleshentët.
Sipas Snapchat, platforma funksionon kryesisht si një aplikacion mesazhesh, përmes të cilit të rinjtë qëndrojnë në kontakt me miqtë dhe familjen. Ndërkohë, ligji australian po shihet si precedent ndërkombëtar, duke nxitur iniciativa të ngjashme në vende të tjera, përfshirë Indinë dhe Francën, ku një ndalim për përdoruesit nën 15 vjeç pritet të hyjë në fuqi deri më 1 janar 2027. /skyweb.al
