Administrata Tatimore do të nisë në tetor 2025 një Plan Operacional të posaçëm për sektorin e ndërtimit, me qëllim intensifikimin e kontrolleve dhe monitorimin e praktikave financiare, përfshirë edhe përdorimin e kleringut. Sipas Drejtorisë së Përgjithshme të Tatimeve, plani do të zbatohet pas një faze informimi 30-ditore dhe do të fokusohet në adresimin e risqeve fiskale specifike të këtij sektori.
Në dokumentin e tatimeve, sipas Monitor theksohet se objektivat dhe qasja e planit do të publikohen përmes kanaleve të komunikimit të Tatimeve. Ky operacion do të nisë menjëherë pas përfundimit të planit të mëparshëm për sektorin e turizmit.
Plani Operacional në turizëm, i zbatuar këtë vit, synoi formalizimin e sektorit dhe rritjen e të ardhurave buxhetore përmes disa masave konkrete, si:
Rritje me 20% e të ardhurave nga TVSH në turizëm, me normë tatimore 6%.
Rritje me 10% e numrit të tatimpaguesve deklarues TVSH në akomodim dhe bar-restorante.
Monitorim i pagesave për të parandaluar krijimin e borxhit të ri tatimor.
Formalizimi i subjekteve të paregjistruara, përfshirë aktivitetet e stacioneve të plazhit pa kontratë.
Analizat e riskut u kryen mbi bazë të sjelljes fiskale të tatimpaguesve, duke krahasuar xhirot dhe numrin e punonjësve të deklaruar në dy vitet e fundit. Në qershor 2025, Tatimet miratuan edhe pagat referuese për 45 profesione në turizëm, ku paga minimale për kamerierët nuk duhet të jetë më pak se 70,000 lekë, ndërsa për kryekuzhinierët arrin deri në 140,000 lekë.
Me Planin e ri për ndërtimin, Administrata Tatimore synon të aplikojë të njëjtën logjikë kontrolli dhe formalizimi, duke shtrirë verifikimet në një sektor që konsiderohet me risk të lartë fiskal. /skyweb.al
