Agjencia ndërkombëtare e vlerësimit, Fitch Ratings, ka rishikuar lart pritshmëritë për rritjen ekonomike globale në vitin 2025, duke e çuar atë në 2.4 për qind nga 2.2 për qind që ishte parashikuar më parë.
Vendimi u mbështet tek një performancë më e mirë se pritej e ekonomive të Eurozonës dhe Kinës, të cilat kanë treguar ritme pozitive në muajt e fundit.
Megjithatë, raporti i fundit i Fitch thekson se Shtetet e Bashkuara po tregojnë shenja të qarta dobësimi ekonomik.
Agjencia vëren se përveç anketave mbi besimin e konsumatorëve dhe biznesit, edhe të dhënat konkrete të tregut, si konsumi, shpenzimet private dhe tregu i punës, po pasqyrojnë një ngadalësim të ndjeshëm.
Për vitin 2025 dhe 2026, SHBA pritet të ketë një rritje ekonomike prej vetëm 1.6 për qind, shumë më poshtë mesatares historike.
Në anën tjetër, Kina ka tejkaluar pritshmëritë me një rimëkëmbje të fortë të konsumit dhe prodhimit industrial, duke e rritur parashikimin e saj të rritjes në 4.7 për qind. Edhe Eurozona ka dhënë sinjale stabiliteti, çka ka bërë që Fitch të përmirësojë parashikimet për këtë bllok ekonomik.
Pavarësisht rritjes së parashikimit global, agjencia paralajmëron se ekonomia botërore mbetet nën presion. Tensionet tregtare dhe tarifat ndërkombëtare, sidomos ato të shpallura nga SHBA, mund të ndikojnë negativisht tek inflacioni dhe zinxhirët e furnizimit.
Po ashtu, inflacioni i lartë dhe rritja e normave të interesit pritet të kufizojnë fuqinë blerëse të konsumatorëve, duke ndikuar në dobësimin e kërkesës së brendshme në shumë vende.
Sipas Fitch, perspektiva afatmesme për ekonominë botërore mbetet e brishtë. Për vitin 2026 pritet një rritje prej 2.3 për qind, por skenari do të varet nga politikat fiskale dhe monetare të vendeve të mëdha, si edhe nga stabiliteti i tregtisë ndërkombëtare. /skyweb.al
