Gjatë 24 orëve të fundit, situata në vend paraqitet drejt normalizimit, megjithëse në disa qarqe vijojnë problematikat e akumuluara nga prurjet e lumenjve, rrëshqitjet e dherave dhe dëmtimet në infrastrukturë. Nivelet e shumicës së lumenjve janë në rënie dhe hidrovorët në zonat më të prekura po punojnë me kapacitet të plotë, ndërsa forcat e emergjencave, Forcat e Armatosura dhe ekipet vendore mbeten në terren për menaxhimin e situatës.
Në qarkun Vlorë, hidrovorët funksionojnë normalisht dhe niveli i Vjosës në Novoselë vijon uljen. Në Sarandë monitorohet argjinatura e Bistricës në Çukë, ku efektivë të FA ndërhynë në ndihmë të banorëve. Forcat operacionale kanë punuar edhe në Finiq, Konispol dhe Delvinë për pastrim të dherave në rrugët rurale. Në Fier, ekipet vijojnë ndihmën në Çerven dhe Ferras, ku 25 banesa kanë ende prani uji brenda argjinaturës së Vjosës, ndërsa lumi Seman është tërhequr në kuota të sigurta.
Në Korçë, situata në disa njësi si Bulgarec, Vithkuq, Drenovë e Mollaj është qetësuar, ndërsa po punohet intensivisht për mbylljen e çarjeve në argjinaturat e Devollit dhe Dunavecit, me mbështetjen e 20 efektivëve të FA. Ka prani uji në tokat bujqësore në Sheqeras, ndërsa puna përqendrohet në infrastrukturën e fshatrave Moçan, Desmire, Osoje, Gjinikas, Senisht dhe Dolan. Në Pustec vijon largimi i ujit nga bodrumet e katër banesave, ndërsa në Pogradec janë evidentuar rreth 50 dëme në banesa dhe disa ura.
Në Lezhë, rreth 220 hektarë tokë vijojnë të jenë nën ujë, me hidrovorët në funksion të plotë. Po vijojnë punimet për riparimin e digës së dëmtuar në Lagunën e Vain. Në Kurbin punohet në shtratin e lumit Drojë, ndërsa në Mamurras rezultojnë rreth 300 hektarë të përmbytura. Aksi Rrëshen–Bukmirë mbetet problematik për shkak të uljes së bazamentit të rrugës dhe rrëshqitjeve të dherave.
Në Dibër, puna vijon për normalizimin e situatës në segmentin rrugor që lidh Qytetin e Vjetër me Qytetin e Ri. Në Berat, niveli i Osumit është ulur ndjeshëm dhe ujërat në fushat e Velabishtit janë tërhequr. Në Dimal situata po vjen drejt përmirësimit. Në Gjirokastër po punohet në disa zona të dëmtuara nga reshjet, përfshirë urat lidhëse të Dropullit dhe rrëshqitjet në Libohovë e Suhë–Poliçan. Në Tiranë është ndërhyrë në fshatin Shargë për largimin e ujit nga një banesë, ndërsa në Kukës po punohet për normalizimin e situatës në Gjegjan dhe Morinë pas dy rrëshqitjeve.
Qarqet Durrës, Shkodër dhe Elbasan raportojnë situatë të qetë pa problematika të shkaktuara nga moti. Ministria e Mbrojtjes dhe Agjencia Kombëtare e Mbrojtjes Civile vijojnë monitorimin dhe mbeten në kontakt të vazhdueshëm me strukturat në terren për të garantuar mbështetjen e komuniteteve në zonat e prekura. /skyweb.al
