Situata e krijuar nga moti i keq ka detyruar autoritetet të marrin masa emergjente në zonën e Novoselës. Strukturat e Emergjencave Civile kanë kërkuar evakuimin e menjëhershëm të banorëve, për shkak të përmbytjeve të shkaktuara nga dalja e lumit Vjosë nga shtrati.
Sipas informacionit zyrtar, reshjet e dendura kanë sjellë rritje të shpejtë të nivelit të ujit, duke e kthyer lumin në një rrezik të drejtpërdrejtë për jetën dhe shëndetin e qytetarëve. Për këtë arsye, është vendosur evakuimi i banorëve të Njësisë Administrative Novoselë, në Bashkinë Vlorë.
Autoritetet bëjnë me dije se situata mbetet kritike edhe për shkak të prurjeve të larta që vijnë nga zonat e Gjirokastrës dhe Përmetit. Këto prurje po ushqejnë më tej lumin dhe po rrisin nivelin e ujit në pjesën e poshtme të rrjedhës.
Shërbimet emergjente ndodhen në terren dhe po ndjekin situatën nga afër, ndërsa u bëhet thirrje banorëve të bashkëpunojnë me autoritetet dhe të ndjekin udhëzimet për evakuim, për të shmangur çdo rrezik të mundshëm. /skyweb.al
