Autoritetet shqiptare po shqyrtojnë një skenar ndërhyrjeje për të përballuar një pjesë të borxheve të kompanisë ajrore “Air Albania”, e cila ka ndërprerë aktivitetin pas problemeve financiare.
Sipas raportimeve të mediave ndërkombëtare, detyrimet e akumuluara nga kompania arrijnë në rreth 100 milionë euro dhe lidhen kryesisht me qiratë e avionëve, tarifat aeroportuale, furnizimin me karburant dhe shërbime të tjera operative.
Në këtë kuadër, qeveria po vlerëson mundësinë e mbulimit të një pjese të këtyre detyrimeve, me një shumë që përllogaritet rreth 35 milionë euro, me synim shmangien e proceseve gjyqësore me partnerët ndërkombëtarë.
Kompania ajrore ka ndërprerë fluturimet prej disa muajsh, pasi Autoriteti i Aviacionit Civil i hoqi licencën për shkak të mosrespektimit të detyrimeve kontraktore. Pas këtij vendimi, një pjesë e shërbimeve u pezulluan dhe avionët e marrë me qira u bllokuan nga kontraktorët.
Aktualisht, “Air Albania” ndodhet në proces likuidimi, ndërsa zgjidhja e detyrimeve financiare pritet të bëhet në një afat të zgjatur.
Zhvillimi hap debat mbi rolin e shtetit në mbulimin e borxheve të një kompanie ajrore dhe ndikimin që kjo ndërhyrje mund të ketë në financat publike. /skyweb.al
