Administrata Tatimore ka njoftuar shtyrjen e afatit për deklarimin e inventarit analitik të vitit 2025, pas problematikave të shfaqura prej më shumë se dy javësh në sistemin SelfCare.
Sipas njoftimit zyrtar, afati për deklarimin e inventarit analitik me datë 31.12.2025 është shtyrë deri më 20.02.2026. Tatimet sqarojnë se ky vendim është marrë për të garantuar përmbushjen e saktë dhe korrekte të këtij detyrimi ligjor nga ana e tatimpaguesve.
Inventari analitik duhet të përmbajë të dhëna të detajuara për lëndën e parë, produktet e gatshme dhe mallrat për rishitje, të pasqyruara sipas njësisë, sasisë, çmimit dhe vlerës.
Deklarimi i inventarit do të kryhet elektronikisht në sistemin e tatimeve e-Filing, në rubrikën “Çështjet e mia”, brenda datës 20 shkurt 2026, duke u ngarkuar me emërtimin “Inventari 31.12.2025”.
Administrata Tatimore u bën thirrje të gjithë tatimpaguesve që të respektojnë afatin e ri dhe të përmbushin me korrektesë këtë detyrim ligjor, me qëllim shmangien e verifikimeve në vend dhe aplikimit të penaliteteve përkatëse. /skyweb.al
