Bashkia Kamëz ka hapur një procedurë prokurimi për furnizim dhe instalim pajisjesh audio-video, në një kohë kur vendi po hyn gradualisht në periudhën para zgjedhjeve lokale.
Tenderi, i klasifikuar në kategorinë “vlerë e vogël”, synon pajisjen e strukturave të komunikimit dhe medias me teknologji të re transmetimi.
Sipas dokumenteve të publikuara, lista e pajisjeve përfshin tre kamera PTZ, një kontrollues për to dhe një mikser audio me 12 kanale.
Në paketë parashikohen gjithashtu kufje profesionale, pesë mikrofonë për podcast, pesë krahë mbajtës për mikrofonë dhe karta transmetimi.
Prokurimi parashikon edhe pajisje ndihmëse për prodhim video, si tre tripodë profesionalë me kokë të lëvizshme, ndriçim LED për video dhe foto, katër drita LED shtesë dhe gjashtë softbox studioje.
Sipas specifikimeve teknike, pajisjet do të përdoren për prodhimin dhe transmetimin e materialeve audio-vizuale të institucionit.
Procedura do të zhvillohet sipas mekanizmit të ofertave nga operatorët e interesuar, ndërsa pagesa do të kryhet pas përmbushjes së kërkesave kontraktuale.
Ky investim vjen rreth një vit para zgjedhjeve lokale dhe konsiderohet si pjesë e përforcimit të kapaciteteve të komunikimit publik të bashkisë, në një kohë kur aktiviteti institucional dhe prezantimi i projekteve mbetet në fokus të administratës vendore./skyweb.al
