Qeveria ka vendosur pezullimin e punimeve të ndërtimit në zonat turistike të vendit deri më 15 shtator.
Masa përfshin brezin bregdetar, qendrat historike, zonat e mbrojtura me funksion turistik dhe qytetet që regjistrojnë fluks të lartë vizitorësh gjatë verës. Sipas vendimit të fundit të qeverisë, do të ndalohen gërmimet, hedhja e themeleve, ngritja e karabinasë dhe punimet që shkaktojnë zhurmë, pluhur apo ndotje.
Pezullimi prek edhe guroret, pikat e nxjerrjes dhe aktivitetet e përpunimit të inerteve pranë zonave turistike.
Masa mund të zbatohet edhe ndaj kantierëve jashtë këtyre territoreve, nëse aktiviteti i tyre shqetëson pushuesit ose ndikon në funksionimin normal të turizmit.
Nga ndalimi përjashtohen vetëm rifiniturat e brendshme dhe punimet e vogla që nuk krijojnë zhurmë apo ndotje. Këto ndërhyrje do të lejohen të kryhen nga ora 08:00 deri në 17:00.
Koha gjatë së cilës punimet do të qëndrojnë të pezulluara do t’u shtohet afateve të lejeve të ndërtimit.
Për lejet e dhëna nga bashkitë, autoritetet vendore mund të miratojnë shtyrjen e afatit të përfundimit të punimeve. Kontrollet do të kryhen nga bashkitë dhe inspektoratet përgjegjëse për mbrojtjen e territorit.
Vendimi merret në kulmin e sezonit veror, kur zonat bregdetare dhe turistike janë prej javësh të mbushura me pushues. /skyweb.al
