Shoqata Kombëtare e Transportit Qytetas ka ngritur shqetësime serioze mbi detyrimin për përdorimin e terminaleve POS/POI në transportin urban, duke paralajmëruar se pagesa e biletës me kartë bankare mund të rrisë ndjeshëm koston për qytetarët.
Sipas njoftimeve të administratës tatimore, deri më 30 maj të gjitha bizneset që kryejnë shitje me para në dorë, përfshirë edhe operatorët e transportit publik, duhet të pajisen me terminale POS/POI.
Por sipas operatorëve urbanë, nëse një qytetar zgjedh të paguajë biletën e autobusit me kartë dhe jo cash, vetëm tarifa fikse bankare për transaksionin arrin në 30 lekë, pa përfshirë komisionet përqindëse dhe kostot e tjera operative. Kjo do të thotë se një biletë aktuale prej 40 lekësh mund të shkojë deri në 70 lekë, ose rreth 75% më shtrenjtë.
Në një letër drejtuar Ministrisë së Financave, Ministrisë së Ekonomisë, Ministrisë së Infrastrukturës, Drejtorisë së Përgjithshme të Tatimeve, Bashkisë së Tiranës dhe Drejtorisë së Transportit Rrugor, Shoqata Kombëtare e Transportit Qytetas thekson se sektori funksionon me volum shumë të lartë transaksionesh dhe me vlerë shumë të ulët për çdo pagesë individuale, çka sipas saj e bën problematik aplikimin e skemës aktuale të POS-eve.
Sipas shoqatës, tarifat e komunikuara nga bankat për përdorimin e terminaleve POS/POI përfshijnë:
• Komision deri në 2.70% për transaksionet me karta VISA/MasterCard kombëtare
• Komision deri në 3.20% për kartat ndërkombëtare
• Tarifë fikse 30 lekë ose 0.30 euro për çdo transaksion
• Komision instalimi terminali POS prej 5,000 lekësh
• Komision mirëmbajtjeje mujore prej 1,000 lekësh
• Komision mos-përdorimi prej 1,000 lekësh në muaj
• Kosto të terminalit POS deri në 50,000 lekë në raste kontraktuale
• Komision “chargeback” prej 500 lekësh për rast
Shoqata paralajmëron se vetëm tarifa fikse prej 30 lekësh për transaksion përbën pothuajse të gjithë vlerën e një bilete urbane, duke ngritur pikëpyetje serioze mbi realizueshmërinë ekonomike të sistemit në transportin publik.
Operatorët kërkojnë sqarime nga institucionet nëse instalimi i pajisjeve POS do të jetë i detyrueshëm në çdo autobus urban, si do të realizohet pagesa me kartë në kushtet e fluksit të lartë të pasagjerëve dhe kohës së kufizuar në stacione, si dhe kush do të mbulojë kostot: shteti, operatorët apo qytetarët.
Në letër kërkohet gjithashtu informacion nëse do të ketë tavane për komisionet bankare, mbështetje financiare nga shteti, periudhë tranzitore për përshtatjen e sistemit dhe një model të unifikuar elektronik pagesash për transportin publik, si karta qytetare, QR, aplikacione celulare apo sisteme të tjera të dedikuara.
Shoqata deklaron se mbështet formalizimin dhe modernizimin e sektorit, por vlerëson se zbatimi i këtij sistemi në transportin urban kërkon analizë të veçantë teknike dhe ekonomike për shkak të tarifave të ulëta dhe numrit shumë të lartë të transaksioneve ditore.
