Çmimet e naftës në tregjet ndërkombëtare kanë shënuar një rënie të lehtë, por vazhdojnë të mbeten mbi pragun e lartë prej 100 dollarësh për fuçi, të ndikuara nga tensionet e vazhdueshme në Lindjen e Mesme.
Sipas të dhënave më të fundit, nafta Brent ka rënë me rreth 0.6%, duke u vendosur në 107.5 dollarë për fuçi, ndërsa nafta amerikane WTI ka zbritur në pak më shumë se 101 dollarë për fuçi.
Kjo lëvizje erdhi pas deklaratës së presidentit amerikan Donald Trump, i cili theksoi se Shtetet e Bashkuara do të ndërhyjnë për të lehtësuar daljen e anijeve të bllokuara në Ngushticën e Hormuzit.
Megjithatë, pavarësisht këtij zhvillimi, çmimet mbeten të larta për shkak të mungesës së një marrëveshjeje paqeje mes SHBA-së dhe Iranit. Negociatat mes dy vendeve janë ende në vijim, por analistët vlerësojnë se qëndrimet e tyre kryesore vazhdojnë të jenë të kundërta.
Nga ana tjetër, OPEC+ ka njoftuar një rritje të prodhimit me 188 mijë fuçi në ditë për muajin qershor, duke shënuar rritjen e tretë mujore radhazi. Megjithatë, ekspertët paralajmërojnë se kjo rritje mund të mbetet më shumë teorike, për sa kohë tensionet me Iranin vazhdojnë të pengojnë furnizimet përmes Ngushticës së Hormuzit.
Situata në këtë zonë strategjike për tregtinë globale të energjisë mbetet e paqëndrueshme, duke mbajtur tregjet në pasiguri dhe çmimet e naftës në nivele të larta.
