Administrata doganore u ka bërë thirrje subjekteve debitore që të paraqiten pranë degëve doganore përkatëse për të verifikuar situatën e tyre financiare dhe për të parë nëse përfitojnë nga ligji për faljen dhe shuarjen e detyrimeve.
Thirrja vjen pas hyrjes në fuqi të udhëzimit për zbatimin e ligjit nr. 86/2025 “Për fshirjen, shuarjen dhe pagesën e detyrimeve tatimore ndaj administratës tatimore qendrore e vendore dhe e detyrimeve të pagueshme në doganë”.
Ky udhëzim përcakton procedurat dhe afatet që duhet të ndjekin subjektet debitore për të përfituar nga fshirja ose shuarja e një pjese të detyrimeve, gjobave dhe kamatëvonesave.
Sipas përcaktimeve të udhëzimit, për detyrimet e papaguara deri më 31 dhjetor 2014 parashikohet fshirja automatike e detyrimeve, gjobave dhe kamatëvonesave përkatëse.
Për detyrimet e krijuara gjatë periudhës 2015 deri në 2019, subjektet debitore kanë dy mundësi. Alternativa e parë është pagesa e 50 për qind të principalit brenda datës 30 qershor 2026, duke përfituar faljen e pjesës tjetër të detyrimit, si edhe të gjitha gjobave dhe kamatëvonesave.
Alternativa e dytë është pagesa e 75 për qind të principalit brenda datës 31 dhjetor 2026. Në këtë rast, subjektet përfitojnë faljen e 25 për qind të mbetur të detyrimit, si edhe fshirjen e plotë të gjobave dhe kamatëvonesave.
Për detyrimet që i përkasin periudhës 2020 deri në 2024, ligji parashikon fshirjen e gjobave dhe kamatëvonesave, në rast se paguhet i plotë detyrimi kryesor brenda datës 31 dhjetor 2026.
Drejtoria e Përgjithshme e Doganave fton të gjitha subjektet debitore që të verifikojnë pranë degëve doganore nëse përfshihen në dispozitat e ligjit dhe të ndjekin procedurat administrative përkatëse.
Sipas administratës doganore, zbatimi i këtij ligji synon të lehtësojë barrën financiare për bizneset, të nxisë formalizimin dhe të krijojë mundësi për mbylljen e detyrimeve të prapambetura përmes procedurave lehtësuese të përcaktuara në legjislacion. /skyweb.al
