Drejtoria e Përgjithshme e Tatimeve ka njoftuar nisjen e zbatimit të ligjit për faljen dhe shuarjen e detyrimeve tatimore, në vijim të udhëzimit nr. 11, datë 14 maj 2026.
Sipas njoftimit, nga data 10 qershor 2026, tatimpaguesit mund të kryejnë pagesat për të përfituar nga lehtësitë ligjore të parashikuara për detyrimet e prapambetura.
UDHËZIMI/ Qeveria i hap rrugën Paqes Fiskale, kush përfiton dhe si
Për detyrimet tatimore të krijuara deri më 31 dhjetor 2014, ligji parashikon fshirjen automatike të detyrimeve, gjobave dhe kamatëvonesave. Për kontributet e sigurimeve shoqërore dhe shëndetësore nuk falet detyrimi principal.
Një tjetër kategori përfituese janë detyrimet që i përkasin periudhës 1 janar 2015 deri më 31 dhjetor 2019. Për këto detyrime, tatimpaguesit mund të përfitojnë fshirjen e 50 për qind të principalit, nëse paguajnë njëherësh 50 për qind të detyrimit nga data 10 qershor deri më 30 qershor 2026.
Nëse pagesa kryhet më vonë, deri më 31 dhjetor 2026, falja zbret në 25 për qind të principalit, me kusht që tatimpaguesi të paguajë 75 për qind të detyrimit. Në të dyja rastet, gjobat dhe kamatëvonesat fshihen plotësisht.
Për detyrimet e periudhës 1 janar 2020 deri më 31 dhjetor 2024, ligji parashikon fshirjen e gjobave dhe kamatëvonesave, në rast se tatimpaguesi paguan 100 për qind të detyrimit principal deri më 31 dhjetor 2026.
Administrata tatimore u bën thirrje tatimpaguesve të respektojnë afatet e përcaktuara, në mënyrë që të përfitojnë nga falja e detyrimeve dhe lehtësitë e parashikuara në ligj. /skyweb.al
