Qeveria greke po vendos kufizime të reja të forta për ndërtimin e parqeve eolike dhe fotovoltaike, duke ndryshuar ndjeshëm hartën e energjisë së rinovueshme në vend.
Sipas planit të ri të publikuar për konsultim, pothuajse të gjithë ishujt Ciklades përjashtohen nga ndërtimi i fermave të reja me erë. Përjashtim bëjnë vetëm Androsi dhe Naksos.
Në ishujt Dodekanezë do të lejohen projekte të reja vetëm në Rodos dhe Karpathos.
Masa më e fortë është ndalimi i ndërtimit të parqeve eolike në ishuj më të vegjël se 300 kilometra katrorë.
Kjo prek shumicën e ishujve të vegjël turistikë të Egjeut, ku prej vitesh ka pasur reagime nga banorët për ndikimin në peizazh dhe turizëm.
Përjashtime do të lejohen vetëm për projekte me interes publik, si furnizimi me ujë apo siguria energjetike e ishujve.
Kufizime të reja vendosen edhe në territorin kontinental. Nuk do të lejohen ferma me erë në lartësi mbi 1200 metra dhe as në male të paprekura pa infrastrukturë rrugore.
Gjithashtu, ndalohet vendosja e turbinave me erë në shumë zona të mbrojtura për shpendët.
Edhe për panelet diellore vendosen rregulla të reja. Fotovoltaikët nuk do të lejohen më në zonat me pyje, male të paprekura dhe zona me rëndësi të veçantë natyrore.
Projektet pranë monumenteve historike apo zonave arkeologjike do të duhet të kalojnë studime shtesë për ndikimin vizual në peizazh.
Megjithatë, projektet që kanë hyrë tashmë në proces licencimi ose kanë dorëzuar dokumentacion të plotë deri më 20 maj nuk preken nga kufizimet e reja.
Sipas autoriteteve greke, kufizimet e reja prekin projekte me kapacitet rreth 37 GW, ndërsa mbi 50 GW investime të tjera mbeten aktive.
Qeveria greke argumenton se ndryshimet synojnë të mbrojnë mjedisin dhe zonat turistike, pa bllokuar investimet që janë në fazë të avancuar. /skyweb.al
