Shkollat në Shqipëri po ndiejnë gjithnjë e më shumë efektet e tkurrjes demografike. Sipas të dhënave të INSTAT për vitin shkollor 2025 2026, në arsimin parauniversitar janë regjistruar 399,258 nxënës, me një rënie prej 1.7% krahasuar me vitin e kaluar.
Goditja më e fortë është në arsimin 9 vjeçar, ku janë regjistruar 243,764 nxënës, ose 2.7% më pak se një vit më parë. Ky është niveli kryesor i sistemit arsimor dhe rënia aty tregon qartë se ulja e lindjeve dhe emigrimi po reflektohen drejtpërdrejt në shkolla.
Në kopshte ka një rritje të lehtë, me 66,343 fëmijë të regjistruar, ose 0.7% më shumë se vitin e kaluar. Ndërsa në arsimin e mesëm të lartë janë regjistruar 88,837 nxënës, me rënie 0.4%.
Arsimi profesional vijon të mbetet me peshë të kufizuar. Vetëm 19.4% e nxënësve të arsimit të mesëm të lartë janë regjistruar në profesional, ndërsa vajzat përbëjnë vetëm 17.2% të të regjistruarve në këtë drejtim.
Në arsimin e lartë janë regjistruar 115,782 studentë. Vajzat dominojnë në universitet, me 56.8% të të regjistruarve në Bachelor dhe 67.6% në Master.
Degët më të preferuara mbeten Biznes, administrim dhe ligj me 25.2% të studentëve, Shëndet dhe mirëqenie me 22.2% dhe Inxhinieri, prodhim dhe ndërtim me 16.9%.
Të dhënat tregojnë një panoramë të qartë: parauniversitari po tkurret, rënia më e fortë është në arsimin 9 vjeçar, profesionali ende nuk po merr peshën që pritet, ndërsa universiteti dominohet nga vajzat dhe nga degët e biznesit, shëndetit dhe inxhinierisë.
