Operacioni i SPAK kundër një grupi të dyshuar për trafik ndërkombëtar droge dhe pastrim parash prek edhe tre emra të lidhur me projekte të mëdha ndërtimi në Tiranë. Sipas informacioneve paraprake, SPAK dhe Policia e Shtetit po ekzekutojnë 20 masa sigurie, nga të cilat 15 “arrest në burg” dhe pesë “arrest në shtëpi”.
Artur Shehu dhe Ilir Shtufi janë shpallur në kërkim, pasi ndaj tyre raportohet se është caktuar masa e sigurisë “arrest në burg”, ndërsa biznesmeni Orest Sota është arrestuar gjatë operacionit.
Në kërkim për ekzekutimin e masës raportohet edhe Orges Birçaj, ndaj të cilit është caktuar “arrest në shtëpi”. Masa arrest shtëpie raportohet se është dhënë edhe Edmond Jaupin.
Personat e përfshirë dyshohen për trafikim të lëndëve narkotike, pastrim të parave në vlera të mëdha dhe kryerjen e veprave penale në kuadër të një grupi të strukturuar kriminal.
Operacioni mund të ketë ndikim edhe në sektorin e ndërtimit në Tiranë, pasi Ilir Shtufi kontrollon ose zotëron pjesë në kompani që kanë në zhvillim disa prej projekteve më të mëdha shumëkatëshe të kryeqytetit.
Masat e sigurisë ndaj personave nuk sjellin automatikisht pezullimin e lejeve apo ndërprerjen e punimeve, shkruan skyweb.al, megjithatë, mungesa e pronarëve dhe hetimet e mëtejshme të SPAK për pastrim parash mund të ndikojnë në ecurinë e projekteve, nëse ata shpallen fajtorë.
Projektet e lidhura me Ilir Shtufin
“Mount Tirana” është një kullë multifunksionale me 58 kate mbi tokë dhe shtatë kate nëntokë, në Rrugën e Barrikadave.
Leja e ndërtimit u miratua më 8 mars 2023 për shoqërinë “Nova Construction 2012”, sot “Nova Construction Group”.
Ilir Shtufi zotëron 91% të kapitalit të kësaj kompanie, ndërsa 9% zotërohet nga Kujtim Shtufi.
Me lartësi të projektuar rreth 205 metra, “Mount Tirana” është një nga kullat më të larta në ndërtim në kryeqytet dhe në momentin e miratimit u prezantua si ndërtesa më e lartë e vendit.
“Hora Vertikale” parashikon struktura me lartësi të ndryshme, ku më e larta arrin në 41 kate mbi tokë, si dhe pesë kate parkimi nëntokë.
Projekti ndodhet në Rrugën “Muhamet Gjollesha” dhe leja e zhvillimit u miratua më 18 tetor 2023.
Zhvillues janë kompanitë “Develalb Construction” dhe “Edonil Konstruksion”. Ilir Shtufi figuron zotërues i 50% të “Develalb Construction”.
Një tjetër projekt i “Nova Construction Group” është godina multifunksionale me dy struktura 44 dhe 55 kate, si dhe pesë kate nëntokë, në Rrugën “Dritan Hoxha” e njohur si Bond Tower.
Leja e ndërtimit për këtë projekt u miratua më 20 nëntor 2024.
Shtufi lidhet edhe me “Nova Hotel Five Star”, përmes kompanisë “Ferro Beton & Construction Co”, ku zotëron 50% të kapitalit.
Projekti në zonën e ish-Gardës së Republikës parashikon hotel, zyra, shërbime dhe banim, me 35 kate mbi tokë dhe gjashtë kate nëntokë.
Orges Birçaj dhe “Top Seven Tower”
Emri i Orges Birçajt lidhet historikisht me shoqërinë “Top Seven”, ku ka qenë administrator deri në janar të vitit 2020.
Sipas të dhënave aktuale të regjistrit tregtar, pronare e vetme e “Top Seven” është Erinda Lutaj, ndërsa administrator është Bledi Shkëmbi.
“Top Seven” zotëron 100% të kompanisë “Top Seven Construction”, e cila ka marrë lejen për ndërtimin e “Top Seven Tower”.
Projekti ndodhet në Rrugën “Dritan Hoxha” dhe përfshin dy struktura me 33 dhe 35 kate mbi tokë, si dhe katër kate nëntokë.
Leja e ndërtimit është miratuar nga Këshilli Kombëtar i Territorit më 2 korrik 2024.
/skyweb.al
