Banka e Shqipërisë ka hedhur për konsultim projekt-rregulloren që synon uljen e komisioneve që bizneset paguajnë për pagesat me kartë.
Sipas draftit, tarifa e shkëmbimit nuk mund të jetë më e lartë se 0.2% për pagesat me kartë debiti dhe 0.3% për pagesat me kartë krediti.
Kjo tarifë është një nga elementët kryesorë të kostos që tregtarët paguajnë sa herë klientët kryejnë pagesa me kartë. Disa biznese kanë shprehur prej kohësh shqetësim për nivelin e lartë të komisioneve, sidomos për transaksionet me karta të lëshuara jashtë vendit.
Aktualisht, komisioni total për pagesat me kartë mund të arrijë deri në 3%, pasi përveç tarifës së shkëmbimit përfshihen edhe tarifat e skemave ndërkombëtare, si Visa e Mastercard, si dhe marzhi i bankës së tregtarit.
Banka e Shqipërisë vlerëson se rregullorja mund t’i ulë komisionet deri pranë nivelit 1%, ndërsa sektori bankar sheh si më realist një nivel rreth 1.5%.
Zbatimi i rregullores pritet të kërkojë kohë, pasi më parë duhet të miratohen ndryshimet në ligjin “Për shërbimet e pagesave”, që janë ende në fazë konsultimi publik. /skyweb.al
