Qeveria ka propozuar ndryshime në ligjin “Për tregtinë elektronike”, si pjesë e procesit të përafrimit të legjislacionit shqiptar me atë të Bashkimit Evropian.
Projektligji synon të vendosë rregulla të reja për tregtinë online dhe të ndalojë gjeobllokimin e pajustifikuar.
Kjo do të thotë se tregtarët nuk duhet të bllokojnë apo kufizojnë aksesin e klientëve në faqe dhe aplikacione online për shkak të shtetësisë, vendbanimit apo vendit ku ndodhen.
Po ashtu, projektligji ndalon ridrejtimin automatik të klientëve në një version tjetër të faqes pa pëlqimin e tyre.
Ndryshimet parashikojnë edhe mosdiskriminim në aksesin te mallrat, shërbimet dhe pagesat elektronike.
Sipas relacionit, projektligji synon forcimin e mbrojtjes së konsumatorëve dhe rritjen e sigurisë juridike në transaksionet online. Nisma është pjesë e përafrimit me Rregulloren e Bashkimit Evropian për gjeobllokimin dhe lidhet me detyrimet e Shqipërisë në procesin e negociatave.
Miratimi i këtyre rregullave përmendet si një nga kushtet për Kapitullin 10, “Transformimi digjital dhe media”.
Projektligji parashikon gjithashtu mekanizma ndihme për konsumatorët në rast mosmarrëveshjeje me tregtarët. Ndryshimet nuk i detyrojnë tregtarët të ofrojnë dërgesa në çdo territor, por ndalojnë trajtimin e ndryshëm dhe të pajustifikuar të klientëve.
