Bujqësia mbetet në periferi edhe të financimit bankar. Ndërsa shifrat e INSTAT tregojnë për një tkurrje të fortë shumëvjeçare të blegtorisë, të dhënat e kreditimit konfirmojnë problemin. Vetëm 1.3% e portofolit të kredisë për bizneset i përket sektorit bujqësor.
Sipas raportit “Tendencat në kreditim”, të publikuar nga Banka e Shqipërisë, kjo ishte pesha e bujqësisë në fund të qershorit 2026, e pandryshuar nga fundi i vitit të kaluar. Pra, zgjerimi i kreditimit nuk ka sjellë një peshë më të madhe të sektorit në financimin bankar.
Nga çdo 100 lekë në portofolin e kredisë për bizneset, rreth 46.2 lekë i përkasin tregtisë, 21.7 lekë ndërtimit dhe vetëm 1.3 lekë bujqësisë. Shërbimet e tjera zënë 16.1%, ndërsa industria 14.8%.
Në gjashtëmujorin e parë 2026, kredia për bizneset shënoi rritje vjetore prej 11.6%. Por kontributi i bujqësisë në këtë zgjerim ishte vetëm 0.1 pikë përqindjeje, kundrejt 6.1 pikëve nga tregtia dhe 3.3 pikëve nga industria.
Vetë autorët e raportit e cilësojnë kontributin e bujqësisë si praktikisht margjinal, pavarësisht rëndësisë së saj strukturore në ekonomi. /skyweb.al
