Thesari Amerikan (US Mint) ka nxjerrë monedhën 1-dollarëshe amerikane të vitit 2026 me Presidentin Donald J. Trump, duke shënuar herën e parë që një president në detyrë i SHBA-së paraqitet në një monedhë të prodhuar për përdorim të përditshëm. Sipas US Mint, monedhat kanë hyrë tashmë në qarkullim, ndërsa rrotullat dhe qeset me monedha do të dalin në shitje nga mesdita sipas orës së Lindjes së SHBA-së.
Paratë amerikane tani mbajnë portretin e presidentit aktual të SHBA-së.
US Mint konfirmoi të enjten se monedha e artë (“golden dollar”), e cila paraqet portretin e Presidentit të SHBA-së Donald Trump, është hedhur në qarkullim. Mint u bëri thirrje njerëzve të kontrollojnë kusurin e tyre, ndërsa koleksionistët mund ta blejnë monedhën në rrotulla dhe qese, të shitura ekskluzivisht përmes kanaleve zyrtare të Mint-it.
Produktet kushtojnë 61 dollarë për një rrotull me 25 monedha dhe 154,50 dollarë për një qese me 100 monedha.
Në praktikë, gjetja e një monedhe të tillë në kusur mund të kërkojë durim, pasi monedhat 1-dollarëshe nuk janë përhapur gjerësisht në mesin e blerësve amerikanë dhe qarkullojnë shumë më rrallë se kartëmonedhat.
Koleksionistët kanë edhe një detaj tjetër për të kërkuar: US Mint ka prodhuar 250,000 monedha më 4 korrik, të cilat mbajnë një shenjë të veçantë (“privy mark”) me mbishkrimin “July 4th”. Këto monedha janë shpërndarë nëpër rrotullat dhe qeset që janë nxjerrë në shitje.
Pavarësisht ngjyrës së saj, monedha nuk përmban ar. Ajo përbëhet nga 88,5% bakër, ndërsa pjesa tjetër përmban sasi më të vogla zinku, mangani dhe nikeli.
