Forcimi i pazakontë i lekut ndaj euros teorikisht duhej të ulte koston e mallrave të importuara. Të dhënat e fundit të INSTAT tregojnë se edhe ky avantazh po shteron.
Në tremujorin e dytë të vitit 2026, Indeksi i Çmimeve të Importit arriti në 107.5 pikë. Kjo do të thotë se produktet industriale të importuara mbeten 7.5% më të shtrenjta se në vitin 2021, pavarësisht se euro dhe dollari këmbehen shumë më lirë.
Krahasuar me të njëjtën periudhë të vitit të kaluar, çmimet e importit u ulën me vetëm 0.1%, ndërsa kundrejt tremujorit të parë ndryshimi ishte praktikisht zero, vetëm 0.001%.
Ndërkohë, “super Leku” ka goditur fort industrinë eksportuese shqiptare. Përveç se me të njëjtën sasi eurosh, importuesit nga Shqipëria blejnë më pak mall, kompanitë që shqiptare shesin mallra jashtë vendit arkëtojnë kryesisht në euro, por pagat, energjinë, taksat dhe pjesën më të madhe të shpenzimeve i paguajnë në lekë.
Me zhvlerësimin e euros, çdo 1,000 euro të ardhura u sjellin eksportuesve shumë më pak lekë se disa vite më parë.
Kjo ka tkurrur fitimet, ka ulur konkurrueshmërinë dhe ka vënë nën presion veçanërisht industrinë fason, prodhuesit e këpucëve dhe tekstileve, bujqësinë dhe bizneset e tjera të orientuara drejt eksportit.
Në këmbim të kësaj goditjeje, ekonomia pritej të përfitonte të paktën nga importe më të lira. Por shifrat tregojnë se ky mekanizëm pothuajse nuk po funksionon më.
Ulja më e fortë vjetore u regjistrua vetëm tek energjia elektrike dhe gazi, me 2.2%. Industria nxjerrëse shënoi një rënie prej 0.2%, ndërsa në industrinë përpunuese çmimet u ulën me vetëm 0.02%.
Duket se Shqipëria po përballet me skenarin më të keq. Eksportuesit po humbasin nga leku i fortë, ndërsa konsumatorët dhe bizneset nuk po përfitojnë më ulje të ndjeshme të çmimeve të importit. /skyweb.al
