Kryeministri Edi Rama ka bërë të qartë se nuk ka ndërmend të largohet nga detyra, pavarësisht protestave të zhvilluara javët e fundit në Tiranë, të cilat janë shoqëruar me episode dhune.
Në një intervistë për median greke “Kathimerini”, kreu i qeverisë shqiptare u shpreh se kërkesa për dorëheqjen e tij është një e drejtë legjitime në një shoqëri demokratike, por theksoi se largimi nga pushteti nuk mund të imponohet përmes dhunës.
“Çdokush mund të kërkojë dorëheqjen time, pasi kjo është pjesë e jetës demokratike. Por askush nuk ka të drejtë ta imponojë atë me dhunë”, deklaroi Rama.
Duke komentuar zhvillimet e fundit politike dhe protestat në kryeqytet, kryeministri bëri një dallim mes qytetarëve, veçanërisht studentëve që kërkojnë perspektiva më të mira për të ardhmen, dhe atyre që, sipas tij, shfrytëzojnë dhunën për të arritur qëllime politike.
Rama u ndal edhe te protestuesit që mbulojnë fytyrën, duke pretenduar se mes tyre ka individë të lidhur me lëvizjen Antifa.
Sipas kryeministrit, një pjesë e vogël e protestuesve synon të shfrytëzojë përshkallëzimin e situatës për të ardhur në pushtet.
“Një pakicë mendon se t’i vërë flakën vendit është rruga më e shkurtër drejt pushtetit”, u shpreh Rama, duke kundërshtuar atë që e cilësoi si përpjekje për të marrë pushtetin përmes dhunës. /skyweb.al
