Në fjalën e tij, Rama u ndal veçanërisht te nevoja për të forcuar burimet njerëzore të AKSHI-t, duke deklaruar se synimi është që ky institucion të ketë pagat më të larta në vend, në mënyrë që të mos humbasë konkurrencën me sektorin privat. Sipas tij, mbështetja për stafin është thelbësore në një moment që ai e cilësoi të vështirë për shkak të goditjeve dhe kritikave që institucioni ka marrë, ndërsa theksoi se çështjet në proces kanë rrugën e tyre ligjore.
Kryeministri e cilësoi Tafën si një profesionist që ka lënë angazhime të tjera për t’u rikthyer në shërbim të administratës publike në një periudhë që përkon me sfida të rëndësishme për sigurinë kibernetike dhe konsolidimin e transformimit digjital. Ai shtoi se përvoja e tij dhe fakti që vjen nga e njëjta fushë e bëjnë një drejtues që kupton gjuhën dhe nevojat e ekipit.
Nga ana e tij, Igli Tafa e përshkroi AKSHI-n si një institucion kyç për modernizimin e shtetit dhe ofrimin e shërbimeve për qytetarët dhe bizneset. Ai falënderoi për besimin e dhënë dhe u zotua se do të kontribuojë me energji dhe përkushtim për ta çuar më tej vizionin e digjitalizimit të plotë të shërbimeve publike, duke vlerësuar kapacitetet ekzistuese të stafit dhe rolin qendror të agjencisë në administratën shqiptare. /skyweb.al
